Juan, ikoneuj Zacarías niman Elisabet, onochiuj teotlajtoketl ijkuak onoskalti. Jehová okititlan Juan makimijli tlaltikpakchanejkej ika uajlaskia Mesías. San ika, yejua xtenojnotsaya ipan sinagogas noso ipan kalpamej, Juan tenojnotsaya ipan tlaluaktli. Nochimej akin ualeuayaj Jerusalén niman Judea konkakiyaj Juan. Yejua okinmachti tlaltikpakchanejkej ika tla kinekiyaj kipaktiskej toTajtsin, nonekiya maka sa makichiuakan tlen xkuajli. Sakin, ijkuak yokikakej, miyekej onoyolkuepkej itech intlajtlakoluan niman Juan okinapolakti ipan atentli Jordán.

Juan nemiya san ika achijtsin. Itlaken tlachijchiujtli katka ika itsojmiyo camello niman kikuaya chapolimej niman neujtli. Kalpan kinekiya kuajli kimatis okseki itech Juan. Hasta fariseos niman saduceos okitatoj. Juan okimijli: “Nemejuamej noneki xmopatlakan niman xmoyolkuepakan. Nenkinemiliaj ika nenuejueyixtokej san pampa nenkijtouaj ika nentekoneuan itech Abrahán. Yejuin xkijtosneki tla nentekoneuan itech toTajtsin”.

Miyekej okitatoj Juan niman okitlajtoltijkej: “¿Tlenon noneki tikchiuaskej niman ijkon tikpaktiskej toTajtsin?”. Juan okimijli: “Tla nenkipiyaj ome nemotlaken xmakakan se akin xtlaj kipiya”. ¿Tikmati tleka ijkon okimijli? Yejua kinekiya makimatikan ika tla kinekiyaj kipaktiskej toTajtsin, nonekiya kintlasojtlaskej oksekimej.

Juan okimijli akin tominsentlaliaj: “Melajki xmoyekanakan niman maka xtekajkayauakan”. Niman soldados okimijli: “Maka  xselikan tlaxtlauijli san ichtaka niman nochipa xkijtokan tlen melauak”.

Teopixkej niman levitas noijki okitatoj Juan niman okijlikej: “Nochimej kinekij kimatiskej akinon tejua”. Juan okijto: “Nejua kentla nitlajtojli tlen tsajtsi ipan tlaluaktli. Nikinyekana tlaltikpakchanejkej itech Jehová, ijkon ken Isaías okijto”.

Tlaltikpakchanejkej kuelkakiyaj tlen Juan kinmachtiaya. Miyekej notlajtoltiayaj tla Juan katka Mesías. San ika, yejua okimijli: “Yakaj akin melak ueyixtika xijkon ken nejua uajlas. Nion xnechmelaua niktojtomas ikakuan. Nejua niteapolaktia ika atl. San ika, yejua teapolaktis ika espíritu santo”.