Johane e lego morwa wa Sakaria le Elisabetha, e ile ya ba moporofeta ge a godile. Jehofa o ile a mo nea mošomo wa go ruta batho gore Mesia o e tla. Eupša go e na le gore Johane a rutele batho disinagogeng goba metseng ya bona, o be a ba rutela lešokeng. Batho ba be ba tloga Jerusalema le Judea gore ba tle ba theetše Johane. O be a ba ruta gore ge ba nyaka go kgahliša Modimo, ba se ke ba dira dilo tše mpe. Ka morago ga gore ba theetše Johane, ba bantši ba be ba tlogela go dira dilo tše mpe gomme Johane a ba kolobetša Nokeng ya Jorodane.

Johane o be a sa phele bophelo bja maemo. O be a apara diaparo tšeo di dirilwego ka boya bja kamela, e bile a eja ditšie le mamapo. Batho ba be ba nyaka go tseba Johane. Gaešita le Bafarisei le Basadutsei bao ba bego ba ikgantšha ba be ba etla go mmona. Johane o ile a re go bona: ‘Le swanetše go fetoga gomme le lahle mekgwa ya lena e mebe. Taba ya gore le re le bana ba Aborahama ga e bolele gore le bohlokwa, le gona ga e bolele gore Modimo o a le amogela.’

Batho ba bantši ba ile ba tla go Johane gomme ba mmotšiša ba re: ‘Re swanetše go dira eng gore Modimo a re amogele?’ Johane o ile a re go bona: ‘Ge e ba o na le diaparo tše pedi, se sengwe sa tšona o se nee yo a se hlokago.’ Na o a tseba gore ke ka baka la eng Johane a ile a bolela bjalo? O be a ruta barutiwa ba gagwe gore ba swanetše go rata batho ba bangwe ge e ba ba nyaka gore Modimo a ba amogele.

Ke moka Johane o ile a botša balekgetho gore: ‘Tshepagalang gomme le se ke la ropa batho.’ Le gona o ile a botša mašole gore: ‘Ge motho a le nea tšhelete ka khoneng gore le mo direle selo se itšego, le gane. E bile le se ke la bolela maaka.’

 Baperisita le Balefi le bona ba ile ba tla go Johane gomme ba mmotšiša gore: ‘Ke wena mang? Batho ka moka ba nyaka go go tseba.’ Ke moka Johane a re: ‘Ke ruta batho ka Jehofa lešokeng, e bile ke ba thuša gore a ba amogele, bjalo ka ge moporofeta Jesaya a boletše seo e sa le pele.’

Batho ba be ba rata seo Johane a bego a ba ruta sona. Ba bantši ba be ba ipotšiša ge e ba Johane e le Mesia. Eupša Johane o ile a re go bona: ‘Yo a mphetago ka bogolo o etla. E bile motho wa gona ga ke swanelege go bofolla dieta tša gagwe. Nna ke kolobetša batho ka meetse, eupša yena o tlo ba kolobetša ka moya o mokgethwa.’