Yohaana, mutabani wa Zekaria na Elizaabeesi, akaba nabi ku yaakuzire. Yehova akakoresa Yohaana kugambira abantu ngu Mesia akaba naaza kwija. Yohaana omu mwanya gw’okubuurira omu sinagogi nari omu tauni, akabuurira omu ihamba. Abantu bakaruga Yerusaalemu n’omuri Buyudaaya yoona kuhuurira ebi Yohaana yaabaire naayegyesa. Akabeegyesa ngu kubaasa kushemeza Ruhanga, bakaba baine kurekyera aho kukora ebintu bibi. Bwanyima y’okuhurikiza ebi Yohaana yaabeegyeise, baingi baketeisa ebibi byabo, kandi Yohaana akababatiza omu Mugyera Yorudaani.

Yohaana akaba amarwa na bikye ebi yaabaire aine. Akaba naajwara ekijwaro ekikozirwe omu byoya by’engamira kandi eby’okurya bye bikaba biri enzigye n’obwoki bw’omu ishwa. Abantu bakaba nibenda kumanya ebirikukwata ahari Yohaana. Nangwa n’Abafarisaayo n’Abasadukaayo abaabaire baine amaryo bakaija kumureeba. Yohaana akabagambira ati: ‘Mwine kuhindura emitwarize yaanyu muketeisa. Mutateekateeka ngu muri ab’omutaano ahabw’okugira ngu muri baijukuru ba Abrahamu. Eki tikirikumanyisa ngu muri abaana ba Ruhanga.’

Baingi bakaija ahari Yohaana baamubuuza bati: ‘Mbwenu shi twine kukora ki kushemeza Ruhanga?’ Yohaana akagambira Abayudaaya ati: ‘Oine amakanzu abiri, aheho otagiine.’ Noomanya ahabw’enki yaagambire atyo? Akaba naayenda ngu abakuratsi be bamanye ngu kubaasa kushemeza Ruhanga, baine kukunda abantu.

Yohaana akagambira abahooza ati: ‘Mube abeesigwa kandi mutarihooza ebirikukira ebi mwaragiirwe.’ Akagambira n’abaserukare ati: ‘Mutikiriza enguzi nari kugamba ebishuba.’

 Abanyamurwa n’Abaleevi nabo bakaija ahari Yohaana baamubuuza bati: ‘Ori oha? Buri omwe naayenda kumanya.’ Yohaana akabagarukamu ati: ‘Ndi eiraka ery’orikugambira omu ihamba, kwebembera abantu kumanya Yehova, nk’oku nabi Isaaya yaagambire.’

Abantu bakakunda ebi Yohaana yaabaire naayegyesa. Baingi bakaguma nibebuuza yaaba Yohaana yaabaire ari Mesia. Kwonka akabagira ati: ‘Orikwija enyima yangye naankiza obushoboorozi. Tinshemereire kwinama kuyuzya enkoba z’enkaito ze. Nyowe nimbabatiza n’amaizi, kwonka we aryababatiza n’omwoyo gurikwera.’