Juanpa tatanqa Zacarías karqa, mamantaj Elisabet. Jehová Diosqa Juanta profeta kananpaj churarqa, paywantaj willacherqa Mesías jamunanta. Juanqa chʼinnejpi willaj, mana llajtaspichu, nitaj sinagogaspichu. Jerusalenmanta, Judeamanta ashkha runasqa Juanpa yachachisqanta uyarej rej kanku. Juanqa paykunaman nerqa: “Diosta kusichinaykichejpaj sajra ruwayniykichejta saqeychej”, nispa. Chayrayku ashkha runas juchasninkumanta pesachikuspa Jordán mayupi Juanwan bautizachikorqanku.

Juanqa camello millmamanta ropayoj karqa, mikhojtaj langostasta, lachiwana miskʼita ima. Runasqa paypa yachachisqanta uyariyta munaj kanku. Jatunchakoj fariseospis, saduceospis Juanman rej kanku. Juantaj paykunaman nej: “Pesachikuychej, ñaupa kausayniykichejtataj saqeychej. Qankunaqa ‘Abrahanpa wawasnin kayku’ nispa mayta jatunchakojtiykichejpis, mana Diospa wawasninchu kankichej”, nispa.

Ashkha runas Juanta nerqanku: “¿Imatá ruwanayku tiyan Diosta kusichinaykupajri?”, nispa. Juantaj nerqa: “Iskay ropayoj kankichej chayqa, ujninta mana ropayojman qopuychej”, nispa. Juanqa chayta nerqa, yachachisqasnin runa masinkuta munakuspa Diosta kusichinankupaj.

Juanqa impuestota cobrajkunamanpis nerqa: “Maychus kajllata cobraychej, ama kurajtaqa”, nispa. Soldadosmantaj nerqa: “Ama llullakuychejchu, nitaj llukʼichikuychejchu”, nispa.

 Sacerdoteswan levitaswanpis Juanta nerqanku: “Tukuy yachayta munanku pichus kasqaykita”, nispa. Juantaj nerqa: “Noqaqa profeta Isaiaspa nisqanman jina chʼinnejpi qhaparishani, runasta Jehová Diosman qayllaykuchinaypaj”, nispa.

Runasmanqa Juanpa yachachisqan mayta gustaj. Chayrayku nej kanku: “¿Paychu Mesías kanman?”, nispa. Juantaj nerqa: “Noqamanta aswan atiyniyoj jamonqa, nitaj jukʼutasninpa watusnillantapis phaskaranaypaj jinachu kani. Noqaqa yakuwan bautizaykichej, paytaj Diospa atiyninwan bautizasonqachej”, nispa.