Juanga Zacariaspa, Elisabetpa churimi carca. Jehová Diosca Juandami profeta shina utilizashpa Mesías shamunata gentecunaman villachun agllarca. Shinapash llactacunapi, tandanajui huasicunapi villachinapa randica, chaquishca pambacunapimi villachijurca. Juanda ‘uyangapaca Jerusalenmanda, Judea llactamandapashmi’ ashtaca gentecuna shamunajurca. Paica nircami, Taita Diospa ñaupajpi ali cangapaca nali ruraicunata saquinami canguichi nishpa. Shina villachijpi ashtaca gentecuna arripintirijpimi Juanga Jordán yacupi paicunataca bautizarca.

Juanga minishtirishca cosascunahuanllami causarca. Paica, ‘camello animalpa milmahuan rurashca churajunata churajushpa, langosta jurucunata, balun mishquitami micushpa causajurca’. Gentecunaca Juanmanda ashtahuan yachangapami munarca. Chaimi jatun tucushca fariseocunapash, saduceocunapash Juanda ricungapaj rirca. Juanga paicunataca nircami: Cangunaca arripintirishpa, cambianami canguichi. “Na cangunapaj shungu ucupilla: ‘Abrahanmi ñucanchi taita’ ninajunachu canguichi”. Abrahanba huahuacuna cashpapash, Taita Diospa huahuacunaca na canguichichu nishpa.

Ashtaca gentecunami Juandaca tapunajurca: Taita Diosta cushichingapaca ¿imatata rurana canchi? nishpa. Chaimi Juanga cashna tigrachirca: ‘Túnica nishca churajunata ishcaita charishpaca, shujtaca na charijcunaman caranami canguichi’ nishpa. ¿Imamanda shina nishcata yachanguichu? Juanga, gentecuna Taita Diosta cushichingapaca, shujcunata juyana cashcata yachachunmi munarca.

Shinallata impuestota cobrajcunatapash cashnami nirca: “Impuestota japichun mandashca cajpipash, chaitallami japina canguichi, na yapalla japinachu canguichi” nishpa. Soldadocunatapashmi cashna nirca: ‘Pitapash imahuanbash manllachishpaca na quichunachu canguichi. Pitapash na yangamanda juchachinachu canguichi’ nishpa.

Sacerdotecuna, levitacunaca Juanda ricungapaj rishpami nirca: Tucuicunami pi cashcata yachangapaj munan nishpa. Shina nijpimi Juanga nirca: ‘Ñucaca, Dios  ima nishcata villaj Isaías villashcashnallata’, gentecuna Jehovaman quimirichun jichushca pambapi villaj runami cani nishpa.

Juan yachachishcataca gentecunaca alicachishpami uyan carca. Juandaca tauca gentecunami Mesías cashcata o na cashcata yachangapaj munarca. Chaimi paica cashna nirca: ‘Ñucami cangunataca, yacupilla bautizajuni. Ashtahuangarin ñucatapash yali ushaita charijmi shamunga. Ñucaca, paipa chaquipi churajushpa huatarishcata pascaitallapash na ushanachu cani. Paimi cangunataca, Diospa jucha illaj espirituhuan bautizanga’ nishpa.