Na ngoi so Jean, so ayeke molenge ti Zacharie na Élisabeth, akono lo ga mbeni prophète. Jéhovah asara kua na Jean ti fa na azo so Messie ayeke ga. Me ahon ti tene Jean afa tënë na yâ ti asynagogue wala na yâ ti agbata, lo yeke fa ti lo tënë na yâ ti benyama. Azo ayeke londo na Jérusalem nga na yâ ti Judée kue ti ga ti mä Jean. Lo fa na ala so ti nzere na lê ti Nzapa, a lingbi ala zia lege ti sarango ye ti sioni. Na peko ti so ala mä Jean awe, mingi ti ala achangé asioni sarango ye ti ala, na Jean abatize ala na yâ ti Ngu ti Jourdain.

Jean ayeke zo so ayeke na aye mingi ape na yâ ti gigi ti lo. Lo yeke yü bongo so a sara ni na kuä ti terê ti chameau nga kobe ti lo ti tengo ni ayeke agbadora nga na mafuta ti otoro ti ngonda. Azo aye mingi ti hinga ye na ndö ti Jean. Même aFarizien nga na aSadducéen so aye baba mingi so aga ti bâ lo. Jean atene na ala, atene: ‘A lingbi ala changé asarango ye ti ala na ala changé bê ti ala. Ala pensé ape so ngbanga ti so ala tene ala yeke amolenge ti Abraham la si ala yeke nde mingi na tanga ti azo. A ye ti tene ape so ala yeke amolenge ti Nzapa.’

Gbâ ti aJuif aga na mbage ti Jean na ala hunda lo, atene: ‘Nyen la a lingbi e sara ti tene e nzere na lê ti Nzapa?’ Jean atene na ala, atene: ‘Zo so ayeke na bongo use, zia lo mû oko na mbeni zo so ayeke na ni ape.’ Mo hinga ngbanga ti nyen la lo tene tongaso? Lo ye si adisciple ti lo ahinga so ti nzere na lê ti Nzapa, ala doit ti ye azo.

Jean atene na azo ti rongo nginza ti impôt, lo tene: ‘Ala sara ye na lege ni na ala mû ye ti zo na likisi ape.’ Lo tene na aturugu, lo tene:  ‘Ala yeda ti tene a pete goro na ala ape wala ala tene mvene ape.’

A-Prêtre nga na azo ti mara ti Lévi aga nga na mbage ti Jean na ala hunda lo, ala tene: ‘Mo yeke zo wa? Zo kue aye ti hinga.’ Jean atene: ‘Mbi yeke go ti mbeni zo so ayeke dekongo na yâ ti benyama, so ayeke gue na azo na Jéhovah, gï tongana ti so Ésaïe atene lani kozo.’

Azo aye tënë so Jean ayeke fa lani na ala. Gbâ ti azo ayeke hunda wala Jean la ayeke Messie ni. Me lo tene na ala, lo tene: ‘Mbeni zo so ayeke kota mingi ahon mbi ayeke ga. Mbi kpa pëpe ti zi kamba ti poro ti lo. Mbi batize ala na ngu, me lo yeke batize ala na yingo vulu.’