Yowano mwana a Zakarii na Elizabete, bafikile mutemuki pabakudile. Yehowa baadi mufube naye bwa kulongyesha bantu pabitale Mesiya baadi na kya kufika. Pamutwe pa kulongyesha mu bitumbwilo sunga mu bibundji, Yowano baadi akalambukisha mu kabaaka. Bantu babaadi abakatuka mu Yeelusaleme na mu Yudeya mooso bwa kuteemesha Yowano. Baadi ebalongyesha bwa kuleka kukita bibubi na kusangasha Efile Mukulu. Kunyima kwa kumuteemesha, bebungi babaadi beelangye kwishimba bwa milwisho yaabo, akupu Yowano nkwibabatshisha mu Mwela wa Yoordano.

Yowano baadi na nshaleelo mupeelepeele. Baadi afwala bilamba bya bwaa bwa nyema na kudya mpasu na kulamba buuki. Bantu abaadi abakimbi bwa kuuka Yowano. Mpa na Bafadisee na Basanduseo abafikile mu kumumona. Yowano bebalungwile shi: ‘Abitungu nulekye mashinda eenu nwilangye. Tanumonanga shi nwi na kineemo kikile kwanwakula shi nwi bana ba Abrahame. Byabya tabileesha shi nwi bana b’Efile Mukulu nya.’

Bebungi abafikile kwi Yowano bamwipusha shi: ‘Twi kukita kinyi bwa kusangasha Efile Mukulu?’ Yowano nkwibalungula shi: ‘Su we na bikotshi bibidi, abitungu kupa kingi kimune kwi muntu shi nakyo.’ Ouku bwakinyi baakwile byabya? Baadi akimbi balongi baaye bwabadya kuuka shi, bwa kusangasha Efile Mukulu abitungu kwikala na kifulo na bantu.

Yowano balungwile bafutshishi ba bitadi shi: ‘Ikalayi balulame na tanuyibanga muntu sunga ngumune.’ Alungula basalayi shi: ‘Tanutshibibwanga milomo sunga kudimba madimi.’

 Ba Tshiite mwakwidi na Beena-Leevi abaadi bafikye namu kwi Yowano bamwipusha shi: ‘We naanyi? Bantu bebungi abadidi kuuka.’ Yowano baakwile shi: ‘Ne eyi dya muntu mu kabaaka, adikunkusha bantu Kwi Yehowa, anka bu bibaadi Yeeshaya mubadiile kwakukula.’

Bantu abaadi bafule myanda ibaadi Yowano ebalongyesha. Bebungi nkwiyipusha su Yowano baadi Mesiya. Anka bebalungwile shi: ‘Kunyima kwande akufiki muntabukile. Ntshi mulombeene sunga kwangula kooshi ka ku sandale yaaye. Ami nenubatshisha mu meema, anka aye akabatshisha na kikudi kiselele..’