Johane indvodzana yaZakhariya na-Elizabethe, waba ngumphrofethi nasakhulile. Jehova watfuma Johane kutsi atjele bantfu ngaMesiya lobekatawufika. Johane akazange afundzise emasinagogeni nasemadolobheni, kodvwa washumayela ehlane. Ngako bantfu baseJerusalema nabo bonkhe baseJudiya beta kuye kuze abafundzise. Wabafundzisa kutsi kute bajabulise Nkulunkulu kufanele bayekele kwenta tintfo letimbi. Bantfu labanyenti nabeva loko, bayekela kwenta tintfo letimbi futsi Johane wababhabhatisa eMfuleni iJordane.

Johane abephila imphilo lemelula. Abegcoka timphahla letakhiwe ngeboya belikamela futsi bekadla tintsetse kanye neluju lwetinyosi. Bantfu bebafuna kwati ngaloko bekakufundzisa. Ngisho nebaFarisi nebaSadusi baya kuye. Johane watsi kubo: ‘Phendvukani. Ningatiyengi nicabange kutsi nincono ngobe nititjela kutsi nibantfwana ba-Abrahama. Loko akusho kutsi nibantfwana baNkulunkulu.’

Bantfu labanyenti baya kuJohane bafike bambuta batsi: ‘Yini lokufanele siyente kuze sijabulise Nkulunkulu?’ Johane watsi kubo: ‘Nangabe unetingubo letimbili, yinye yiphe lote.’ Uyati kutsi kungani asho njalo? Abefuna bantfu bati kutsi kuze bajabulise Nkulunkulu, kufanele batsandze labanye.

Johane watsi kubatselisi: ‘Tsembekani ningafuni umtselo longetulu kwalosemtsetfweni.’ Wase utsi kulabangemasotja: ‘Ningamangaleli bantfu ngemanga.’

 Baphristi nemaLevi baya kuJohane bambuta batsi: ‘Ungubani wena? Bonkhe bantfu bafuna kukwati.’ Johane watsi: ‘Ngilivi lalotsite lomemeta asehlane locondzisa bantfu kuJehova, njengobe nje umphrofethi Isaya asho.’

Bantfu bebakutsandza loko Johane abebafundzisa kona. Labanyenti bebacabanga kutsi unguMesiya. Kodvwa watsi kubo: ‘Kukhona lota emvakwami, lonemandla kunami; ngeke ngikwati nekukhumula tintsambo tetincabule takhe. Mine nginibhabhatisa ngemanti, kodvwa yena utanibhabhatisa ngemoya longcwele.’