Yohanes, anạ i Zakharia dingangi Elisabet, nakoạ nabi su apang i sie naguwạ. Yehuwa něpakẹ si Yohanes gunang měhabarẹ̌ su taumata i Mesias seng duměnta. Katewe, i Yohanes tawe něhabarẹ̌ su sinagoga arau su soa. I sie něhabarẹ̌ ene su padang belantara. Lawọ taumata diměnta bọu Yerusalem dingangu Yudea gunang měngěndung bọu i sie. I sie něněntiro tadeạu makal᷊uasẹ̌ naungu Mawu, i sire harusẹ̌ měngědo měkoạ barang dal᷊akị. Su apang nakaringihẹ̌ ene, lawọ taumata nẹ̌tobatẹ̌, kụ i sie něnahani si sire su Sal᷊ụ u Yordan.

Biahi Yohanes sederhana. Lakụe bọu dukụ u unta, kụ kaěnge kal᷊imbotong dingangu madu. Taumata mapulu masingkạ i sai i Yohanes. Tau Farisi dingangu Saduki lai nakoạ sarang i sie. Yohanes nẹ̌bera si sire, ’I kamene harusẹ̌ pẹ̌bal᷊ui dingangu pẹ̌tobatẹ̌. Abe mẹ̌tiněna i kamene seng kapaelange ual᷊ingu i kamene anạ i Abraham. Ene bal᷊inẹ mangal᷊ene i kamene anạ u Mawu.’

Lawọ taumata nakoạ sarang i sie kụ nẹ̌kiwal᷊o, ’Apa harusẹ̌ koateng i kami tadeạu makal᷊uasẹ̌ naungu Mawu?’ Yohanes simimbahẹ̌, ’Mạeng si kamene piạ darua mantelẹ̌, gělị sěmbaụ si sire apang tawẹ apa.’ Apa i kamene masingkạ kawe nụe i sie nẹ̌bera kerene? I sie mapulu i sire makasingkạ tadeạu makal᷊uasẹ̌ naungu Mawu, i sire harusẹ̌ kuměndagẹ̌ taumata wal᷊inẹ.

Yohanes nẹ̌bera su manga petugas pajakẹ̌, ’I kamene harusẹ̌ pakajujurẹ̌, kụ abe pěngakal᷊ẹ̌ taumata.’ I sie nẹ̌bera su manga prajurit, ’Abe pěnarimạ sasorokẹ̌ arau mẹ̌konti.’

 Manga imang dingangu tau Lewi lai nakoạ sarang i Yohanes kụ nẹ̌kiwal᷊o, ’Sěběnarẹ̌e, i sai i kau? Kěbị taumata mapulu masingkạ.’ Yohanes nẹ̌bera, ’Iạ kai tau měmẹ̌mohang su padang belantara, kụ měngẹ̌ngahạ taumata sarang i Yehuwa, kere seng niul᷊ị i Nabi Yesaya.’

Taumata mal᷊uasẹ̌ su těntirong i Yohanes. Lawọ měkẹ̌kiwal᷊o, apa i sie kai Mesias. Katewe Yohanes nẹ̌bera, ’Taumata kawasane limembong gěguwạ bọu iạ sarung marěnta. Sarang měluạ sělopẹ̌e iạ tawe layak. Iạ měnahani dingangu akẹ katewe i sie měnahani dingangu rohkẹ̌ masusi.’