Yohane, wan u Sekaria mar vea Elisabetu la, yange vese hingir profeti. Yehova yange tindi un ér a pase ior ér Mesiya ngu van. Lu pasen ior kwagh ne ken ushinagoge shin ken ugeri ga, kpa lu pasen ve ken ikyôngo. Nahan ior lu moughon ken Yerusalem man hanma ijiir ken tar u Yuda cii, van hen Yohane, ken ikyôngo. Lu tesen ve kwagh u vea er ve a doo Aôndo a ve yô. A kaa a ve ér ve de u eren afer. Ior kpishi mba yange ve ungwa ityesen na la yô, ve gema asema, ve de asorabo a ve vanden eren la. Nahan Yohane er ve batisema shin Ifi u Yordan.

Yange kwagh gba Yohane sha akaa a iyolough kpishi ga. Ikyondo na lu i sha ice i rakumi, shi yaan mbaahungwa man iyough i ken toho. Yange ior soo u fan kwagh na kpishi. Mbafarishi man Mbasadushi mba ve nengen ayol a ve ér ve hemba perapera la je kpa, va u va nengen a Yohane. Nahan Yohane kaa a ve ér: ‘De nen aeren a en la, gema nen asema. Ne mba kaan ner ne mba ônov mba Aberaham, kpa ngura tseegh tese ér ne hingir ônov mba Aôndo je ve ga. Nahan de henen nen ner Aôndo lumun ne ga.’

Mbayuda kpishi lu van hen Yohane, va pinen un ér: ‘Ka nyi se er ve Aôndo una lumun se?’ Yohane kaa a ve ér: ‘Aluer or ngu a uriga uhar yô, nana gema riga môm nana na orgen u nan lu a riga ga yô.’ U fa kwagh u yange na ve ôr nahan kpa? Yange soo ér mbahenen nav ve fa ér saa vea tesen ér ior doo ve ishima, ve Aôndo una lumun ve ye.

A ôr a mbangoholkpandegh di ér: ‘Ngohol nen kpandegh sha mimi, de mbien nen or ga.’ Ushoja yô, a ôr a ve ér: ‘De ngohol nen ingyatu ga, shi de eren nen aie ga.’

 Upristi kua Mbalevi kpa va hen Yohane, va kaa a na ér: ‘Pase se or u u lu yô.’ Yohane kaa a ve ér: ‘M ngu imo i or u yilan ken taaikyôngo sha u tesen ior gbenda u zan hen Yehova, er Yesaia tsengaôron nahan.’

Yange ior soo kwagh u Yohane lu tesen ve la. Mbagenev kpishi lu henen ér alaghga tsô Yohane ka Mesiya. Kpa a kaa a ve ér: ‘Orgen u hemban mo ngu van. A hembam ica je. Cuku tsô kpa m kuma u saghen un ikyor i akôvough ga. M ngu eren ne batisema sha mnger, kpa un yô, una va er ne batisema sha icighan jijingi.’