Johane, gyanana gya Zakariya ni Elizabheti, a di khala muprofeti tepo a nga dandra. Jehovha a di ruma Johane gu tshumayela vathu gu khuye Mesiya a nguta. Johane kha hevbudza omu nya dzinyumba edzi vathu va nga ba va khozeya umo, ne kha hevbudza sidhoropanani gambe. Ganiolu, a di gu hevbudza giwulani. Vathu va di guta khu Jerusalema ni Judhiya gwatshavbo va ta hevbudzwa khu Johane. A va hevbudzide gu khuye gasi va tsakedwa khu Nungungulu, va di yede gu diga gu gira silo nyo vivbe. Hwane nyo ba va pwide esi Johane a nga ba a hevbudza, gutala nya avo va di dzi laya khu sighoho sawe, khavbovbo Johane a va bhabhatisa Tsongoni wa Joridhani.

Johane a di gu vbanya womi nyo vbevbuge. A di gu ambala sombo nyo girwe khu lidowo nya kamelo nigu a di gu hodza khaba ni wulombe. Vathu nya vangi va di gu mu hlamaleya Johane. Ambari Vafarisi ni Vasadhusi va nga ba vari vathu nya gu dzi khusedze, va di gu hongola va ya mu wona. Johane a di va embeya khuye: ‘Gu vbwetega mu dzi laya, mu vbindrugedza mavbanyelo yanu. Mu nga pimisi gu khenu mu hathegide khu kotani nya olu mu gu khenu mu sanana sa Abrahama. Isoso kha si thuli gilo ga Nungungulu.’

Vathu nya vangi va di hongola ga Johane, va ya mu wudzisa khavo: ‘Ginani hi yedego gu gira gasi hi tsakedwa khu Nungungulu?’ Johane a di embeya Vajudha khuye: ‘Mo ba muri ni mabhadzi mavili, ningeyani limwedo ga oyu a gu mwalo.’ U ngu dziti gu khuwe khu ginani a nga ganeya isoso? A di vbweta gu khuye vathu vati gu khavo gasi va tsakedwa khu Nungungulu, va di yede gu haladza vambe.

Johane a di embeya vahengisi nya mikhupo, khuye: ‘Gu vbwetega mu tumbega mu bwe mu si kanganyisi vathu.’ A di embeya masotshwa khuye: ‘Mu nga dzumeyi gu kanganyiswa ne mu nga liphi.’

 Vapristi ni Valevhi navo va di hongola ga Johane va ya mu wudzisa, khavo: ‘Gasi khuwe mani? Vatshavbo ava vo vbweta gu guti.’ Johane a di khuye: ‘Eni nyi lito li dugeyago giwulani, li yisago vathu ga Jehovha, kha nga edzi a ganedego khidzo muprofeti Isaya.’

Vathu va di gu si tsakeya esi Johane a nga ba a hevbudza. Vangi nya avo va di gu dzi wudzisa gu khavo Johane a diri uye Mesiya gani. Ganiolu, a di va embeya khuye: ‘A nguta muthu nya khongolo guvbindra eni. Eni ne kha nyi ninganedwi gu tshula dzingodzi nya dzisandaliya dzaye. Eni nyo bhabhatisa khu mati, ganiolu uye a gu bhabhatisa khu liphuvbo nya guage.’