Johane mwana waZakkariya aElizabbeti naakakomena wakaba musinsimi. Jehova wakabelesya Johane kuti ayiisye bantu atala akusika kwaMesiya. Pesi Johane wakali kukambawukila munkanda kutali muzikombelo amumyuunzi. Bantu bakali kuzwa muJerusalemu amuJudaya moonse kuti bazooyiisigwe aJohane. Wakabayiisya kuti bakeelede kusiya michito mibi kuti babotezye Leza. Bantu biingi bakamuswiilila Johane akuleka michito yabo mibi alimwi Johane wakababbabbatizya mumulonga waJordani.

Johane wakali kupona buumi buuba. Wakali kuzwaata zigogo zipangidwe aboya bwankamele alimwi wakali kulya nsozi abuchi bwamusokwe. Bantu biingi bakali kuyanda kuziba kuti Johane wakaliini. Nikuba baFarisi abaSadusi bakali kulisumpula, bakali kusika kuti bazoomubone. Mpawo wakababuzya kuti: ‘Mweelede kuleka michito yanu mibi, musanduke. Mutayeeyi kuti mulibantu bayandikana nkaambo mulyaamba kuti muli bana baAbrahamu. Nkaambo eezi tazyaambi kuti Leza ulamutambula.’

Bantu biingi bakasika kulinguwe akubuzya kuti: ‘Tweelede kuchitaanzi kuti tubotezye Leza?’ Johane wakababuzya kuti: ‘Kuti kuli amajansi abili weelede kupa limwi ubula.’ Ulizi na kuti nkamboonzi nakaamba oobo? Nkaambo wakali kuyanda kuti basikwiiya bakwe bazibe kuti beelede kuyanda bamwi kuti babotezye Leza.

Johane wakabuzya basimutelo kuti: ‘Mweelede kusyomeka mutabbidi bantu.’ Wakabuzya basilumamba kuti: ‘Mutatambuli chisinkamulomo kubantu alimwi mutabeji.’

 Bapayizi amaLevi bakasika kuli Johane akubuzya kuti: ‘Nduweni? Bantu boonse bayanda kukuziba.’ Johane wakati: ‘Ndime jwi liwompolola munkanda, litola bantu kuli Jehova mbuli mbakaambilizya musinsimi Isaya.’

Bantu bakali kuziyanda nzyaakali kuyiisya Johane. Bantu biingi bakali kubonaanga Johane nguMesiya. Pesi wakababuzya kuti: ‘Kuli muntu mupati ulikuza. Ngunditakonzyi kwaangununa nikuba ntambo zyansangu zyakwe. Ndibbabbatizya bantu amaanzi pesi uyoobabbabbatizya amuuya uusalala.’