Ua riro o Ioane, te tamaiti a Zekaria raua Elisabeta, ei peropheta a paari ai oia. Ua faaohipa Iehova ia Ioane no te haapii atu i te taata e e tae mai te Mesia. Aita râ o Ioane i haapii atu i roto i te mau sunago aore ra i te mau oire. Ua poro oia i roto i te medebara. I haere na te mau taata no Ierusalema e no te mau fenua atoa o Iudea e faaroo ia Ioane. Ua haapii atu Ioane ia ratou e no te faaoaoa i te Atua, e titauhia ia faaea ratou i te rave i te mau ohipa ino. I to ratou faarooraa ia Ioane, e rave rahi tei tatarahapa mai no ta ratou mau hara. E ua bapetizo o Ioane ia ratou i roto i te anavai Ioridana.

E oraraa au noa to Ioane. Ua omono oia i te ahu huruhuru kamela e ua amu oia i te mau vivi e i te meli. Ua hinaaro te mau taata e ite hau atu â no nia ia Ioane. Ua haere atoa te mau Pharisea e Sadukea teoteo e hiˈo ia ˈna. Ua parau Ioane ia ratou: ‘E titauhia ia taui outou i to outou mau haerea e ia tatarahapa. Eiaha e manaˈo e mea taa ê outou no te mea noa te parau ra outou e e tamarii outou na Aberahama. Eita te reira e faariro ia outou ei tamarii na te Atua.’

E rave rahi tei haere e farerei ia Ioane no te ani atu: ‘Eaha te rave no te faaoaoa i te Atua?’ Ua pahono atura Ioane ia ratou: ‘Mai te peu e e piti ahu ta outou, a horoa ˈtu hoê i te tahi taata aita ta ˈna.’ Ua ite anei oe no te aha ua pahono oia mai te reira? Ua hinaaro oia ia taa ia ratou e no te faaoaoa i te Atua, e mea tia ia here i te mau taata.

Ua parau Ioane i te mau telona: ‘Eiaha e haavare e eiaha e eiâ i te taata.’ Ua parau oia i te mau faehau: ‘Eiaha e farii i te petaraa a te taata e eiaha e haavare.’

 Ua haere atoa te mau tahuˈa e te ati Levi ia Ioane ra no te ani atu: ‘O vai oe? Te hinaaro nei te mau taata atoa e ite i te pahonoraa.’ Ua na ô atura o Ioane: ‘Ua riro vau mai te hoê reo i roto i te medebara, o te aratai ra i te taata ia Iehova, mai ta Isaia i tohu.’

Mea au roa na te taata i te poroi ta Ioane i faaite atu. E rave rahi tei uiui e o Ioane anei te Mesia. Ua na ô râ oia ia ratou: ‘E mana rahi aˈe to te taata e haere mai i muri aˈe ia ˈu. E ore e tia ia ˈu ia tatara i to ˈna tiaa. Te bapetizo nei au i roto i te pape. E bapetizo râ oia i te varua moˈa.’