КИЧЭЭЛ 73
Иоанн орукту белеткеп турар
Захария биле Елисаветаның оглу Иоанн медээчи апарган. Мессияның кээрин улуска чугаалаар кылдыр, Иегова аңаа дагзып каан. Иоанн кижилерни синагогаларга азы хоорайларга эвес, а ээн кургаг ховуга өөредип турган. Иерусалимден болгаш бүгү Иудеядан улус ону дыңнаар дээш кээп турган. Бурганның сеткилинге кирер дизе, багай ажыл-херектер кылырын соксадырын ол улуска чугаалап чораан. Иоанны дыңнааш, хөй улус бачыдын миннингеш, Иордан хемге сугга суктуруп алган.
Иоанн бөдүүн кылдыр чурттап чораан. Ол теве дүгүнден кылган хептиг, а чиир чеми шартылаа болгаш ховунуң ары чигири турган. Иоанны улус сонуургап, көрүксээр турган. Безин аңаа өрү көрдүнер фарисейлер болгаш саддукейлер чедип келген. Иоанн оларга: «Өскерлип алгаш, бачыдыңар минниңер. Авраамның оолдары бис дээш, бодуңарны тускай бис деп бодап турар силер. Ынчалза-даа ол чүүл силерни Бурганның ажы-төлү дивээни ол-дур» — дээн.
Хөй улус Иоаннга келгеш: «Бурганга чүнү кылып болур бис?» — деп айтырып турган. Иоанн оларга: «Ийи хөйлеңниг болзуңарза, ооң бирээзин ону хереглээн кижиге бериптиңер» — дээн. Ол чүге ынча дээнил, билир сен бе? Кижилерге ынак боорувус Бурганга чугула деп чүүлдү өөреникчилери билип алзын дээш, ол ынча дээн.
Иоанн үндүрүг хавырыкчыларынга: «Шынчы болуңар база кымны-даа мегелевеңер» — дээн. А дайынчыларга ол: «Хээли албаңар база мегечи болбаңар» — деп чагаан.
Оон ыңай Иоаннга бараалгакчылар болгаш левиттер келгеш: «Сен кым сен? Улус билип алыксап тур» — дээн. Иоанн оларга: «Мен ээн кургаг ховуда үн-дүр мен. Иеговаже орукту айтып берип турар мен. Мээң дугайымда Исайя медээчи чугаалап чораан» — деп харыылаан.
Улус Иоанны дыка дыңнаксаар турган. Хөй улус безин ону Мессия деп бодап турган. Ынчалза-даа ол: «Удавас менден күчү-күштүг кижи кээр. Мен ооң идииниң шидиишкинин безин чежеринге төлеп чок мен. Мен улусту сугга суп турар мен, а ол ыдыктыг сүлдеже сугар» — деп чугаалаан.
«Ол кижи Чырыктың херечизи болур дээш база шупту улус ону дамчыштыр бүзүрезин дээш чедип келген» (Иоанн 1:7)