Yohani, mwaana a Zakariya ni Elizabeti, aahikhala profeta vaavo annunwe awe. Yehova aahimuruma Yohani owiixuttiha atthu wira Mesiya aamoorwa. Masi ohiya olaleeryaka musinagoga aahiiso mmuttettheni, Yohani aalaleerya moothakoni. Owo aaniwiixuttiha itthu sinceene atthu yaakhuma oYerusalemu ni elapo yotheene ya oYudeya. Nave aanaaleela wira yaaphavelaka omusiveliha Muluku, yaahaana ohiya opaka itthu soohiloka. Nuumala onwiriyana Yohani, atthu anceene yaahittharuwa itampi saya, vano Yohani aahaabatiza Mmuro Yordani.

Yohani khaarina mihakhu sinceene. Owo aawara ikuwo saapakiwa ni manri a ikamelo ni aakhuura misope ni olya oravo wa mutakhwani. Atthu anceene yaanitikinihiwa ni Yohani. Hata aFarisi ni aSaduki yaawo yaari oowiixinnuuha, yaahirwa onweha. Yohani aahaahimeerya so: ‘Murukunuxe mirima sanyu ni muttharuwe itampi sanyu. Muhuupuwele wira mwa atthu oothanliwa mwaha woowi munihimya wira mwa anamwane a Abrahamu. Eyo khentaphulela wira nyuwo mwa anamwane a Muluku’.

Atthu anceene yaahimukoha Yohani wira: ‘Vano-nto nipakeke exeeni wira nimuhakalalihe Muluku?’ Yohani aahaahimeerya aYuda ale wira: ‘Ole orina ikuwo piili, akuxe emosa anvahe mukhwaawe ohirina’. Munnisuwela nthowa naya aahimmye awe siiso? Mwaha woowi aaphavela owiixuttiha atthareli awe wira yaaphavelaka omuhakalaliha Muluku, yaahaana waaphenta atthu akina.

Yohani aahaaleela anamaliviha mpoosito wira: ‘Muhilivihe ovikana sirummwale anyu’. Nave aahaaleela anakhotto wira: ‘Muhaakhele makhwankwa ni muhimootherye mutthu’.

 Alipa a mukuttho ni aLevi yaahirowa omukoha Yohani wira: ‘Nyuwo mwa pani? Atthu aniphavela woosuwelani’. Yohani aahiwaakhula wira: ‘Miyo ka nsu na mutthu onikhuwela moothakoni. Miyo kiniwaataaniha atthu ni Yehova, sintoko aahimmye awe profeta Yesaya’.

Atthu yaanisiveliwa itthu yiixuttihiwa aya ni Yohani. Anamunceene yaaniikoha akhala wira Yohani aari Mesiya. Masi Yohani aanaaleela so: ‘Onimoorwa mukina ookivikana yoomi. Miyo nkimphwanela otaphula mikhoyi sa ixapattho sawe. Miyo kimbatiza ni maasi, masi owo onrowa obatizaka ni munepa wootteela’.