Hi Juan nga anak nira Sakarias ngan Elizabeth nagin propeta pagdaku niya. Gin-gamit hiya ni Jehova basi tutdoan an mga tawo nga maabot an Mesias. Pero imbes magtutdo ha mga sinagoga o ha mga bungto, nagtutdo hiya ha kamingawan. An mga tawo tikang ha Jerusalem ngan ha bug-os nga Judea napakadto ha iya basi mahibaro. Gintutdoan niya hira nga basi mapalipay an Dios, kinahanglan hira umundang pagbuhat hin maraot. Katapos mamati kan Juan, damu an nagbasol ha ira mga sala, ngan iya hira ginbawtismohan ha Salog Jordan.

Simple an pagkinabuhi ni Juan. An iya bado hinimo ha barahibo han kamel ngan an iya pagkaon mga duron ngan dugos. Interesado an mga tawo mahibaro mahitungod ha iya. Bisan an hambog nga mga Pariseo ngan mga Saduseo napakadto ha iya basi makita hiya. Ginsidngan hira ni Juan: ‘Kinahanglan magbag-o kamo ngan magbasol. Ayaw paghunahuna nga espesyal kamo tungod la kay nasiring kamo nga mga anak kamo ni Abraham. Diri ito nagpapasabot nga mga anak kamo han Dios.’

Damu an napakadto kan Juan ngan napakiana: ‘Ano an kinahanglan namon buhaton basi mapalipay an Dios?’ Ginsidngan hira ni Juan: ‘Kon may duha ka nga pantungbaw nga bado, ihatag an usa ha nanginginahanglan hito.’ Maaram ka ba kon kay ano nga ginsiring niya ito? Karuyag niya hibaroan han iya mga disipulo nga basi mapalipay an Dios, kinahanglan higugmaon nira an mga tawo.

Ginsidngan ni Juan an mga parasukot hin buhis: ‘Magin tangkod kamo ngan ayaw panlimbong.’ Ginsidngan niya an mga sundalo: ‘Ayaw kamo karawat hin hukip ngan ayaw pagbuwa.’

 An mga saserdote ngan mga Levita kinadto liwat kan Juan ngan nagpakiana: ‘Hin-o ka? Ito an karuyag hibaroan han ngatanan.’ Hi Juan binaton: ‘Ako an tingog ha kamingawan, nga naggigiya ha mga tawo ngadto kan Jehova, sugad han igintagna ni Isaias.’

Naruyagan han mga tawo an igintutdo ni Juan. Damu an naghunahuna kon hiya ba an Mesias. Pero ginsidngan niya hira: ‘May maabot nga mas labaw kay ha akon. Diri ngani ako angay bisan ha paghukas han iya sandalyas. Nagbabawtismo ako pinaagi han tubig, pero magbabawtismo hiya pinaagi han baraan nga espiritu.’