Jaona zanakany Zakaria ndreky Elizabeta koa fa be, nanjary paminan̈y. Nirahiny Jehovah nampianatra olo izy fa efa ho avy Mesia. Tsy nampianatra tamy synagoga na tantanàna izy, fa nitory tamy tany paiky tan̈y. Olo baka a Jerosalema ndreky baka a Joda navy nitandren̈y izy. Jaona nivolan̈a tamindro fa tsy tokony han̈ano raha ratsy eky iro, koa tihamparavoravo Zan̈ahary. Maro olo nibebaka ndreky nitandren̈y izy, ke iro nataony batisa tamy Ten̈aranony Jordana.

Nanan̈a fiain̈ana tsotra Jaona. Lamba vita tamy volovolony rameva fisikininy, baka io valala ndreky antely dỳ hanin̈inany. Tsy karaha olo jiaby izy, ke tianolo ho hay. Tamy zen̈y, firaka tamindro Fariseo ndreky iro Sadoseo nan̈ambony ten̈a aby io, nandeha nizaha izy. Ho Jaona tamindro: ‘Anaro mila miova ndreky mibebaka. Aza mitoron̈o zanaka Abrahama, fa anaro tsy an̈abonolo jiaby. Anaro ndray zanaka Abrahama, anaro tsy zanaka Zan̈ahary.’

Maro olo nan̈aton̈o Jaona nan̈ontany: ‘Ino raha tokony hataonay baka hamparavoravo Zan̈ahary?’ Ho Jaona tamindro: ‘Anaro koa misy lamba aroe, araiky ameza olo sahiran̈a.’ Nan̈ino ma Jaona nivolan̈a zen̈y? Tiany ho hainy pianatranany aby io fa iro tsy maintsy tia olo, izikoa tiandro ho ravoravo Zan̈ahary.

Ho Jaona tamy pamory latety aby io: ‘Man̈anova ny marin̈y, ke aza mamitaka olo.’ Hoizy tamy maramila aby io: ‘Aza man̈ano risoriso, baka io aza mavandy.’

 Nan̈aton̈o Jaona koa iro pisoron̈o ndreky Levita aby io, nan̈ontany: ‘Azovy ma anao? Olo jiaby tihahay zen̈y.’ Ho Jaona: ‘Zaho io feo amy tany paiky, mitariky olo han̈aton̈o Jehovah, mira raha nambarany Isaia.’

Tianolo aby io raha nampianariny Jaona iro. Maro olo nieritreritry fa Jaona io Mesia. Izy nivolan̈a tamindro: ‘Misy olo bebenaka ho avy. Zaho tsy man̈eva hamaha tadiny kiraronany foeky. Zaho man̈ano batisa anaro amy rano, fa izy han̈ano batisa amy fan̈ahy masin̈y.’