Yoane nangia wiri Zakaraya na Erizabeta ada ni nebi ho ko asono ni. Yekova amangisunge na Yoane ka yugopai fu aboro nga Masiya naye. Kuba gupai nga Yoane ni yugupai rogo abambutiria na rogo agbata, ko aatungusapai ngbakungba yo. Aboro anaaye Yerusarema yo na Yuda yo kaa wirikapai be Yoane. Ko aayugo gupai fuyo nga, tipa ka sa ngbarago ti Mbori, si naida i mbu manga gbegberẽ apai. Fuo aboro degetuyo fu Yoane, dungu yo asaberã ti gayo aingapai na Yoane ki bapatizi yo rogo gu di nga Yaradene.

Yoane aaraka taata raka. Ko anaavo gu roko i ambakadihe rogo kpoto anya na kini ri ayere gbiati anyege. Aboro aaida ka inopai tipa Yoane. Zavura agu airarukö nangia aFarusi gbiati aSadoke aye ka biko. Yoane aya fuyo: ‘Si naida oni aria gaoni gene mangaapai na ki sa gaoni berã. Ka oni berẽnga gupai nga oni nga kparakpara aboro ya mbiko gupai gbua nga oni naya awiri Abarayama nga oni. Gipai re ayugongo gupai nga awiri Mbori nga oni te.’

Dungu aboro aye fuo Yoane ki sanako nga: ‘Ginipai si aida ani mangihe ka sa ngbarago ti Mbori?’ Yoane aya fu aYudo wẽ: ‘Ka mo du na aroko bero ue, mo fu gu sa fu gu boro du na zingoho.’ Ya mo mo iningo ndu gupai ko ape gupai re ti ni? Ko aaida gako abawiriki ini gupai nga, tipa ka sa ngbarago ti Mbori, i du wa ka i kpinyemu aboro.

Yoane aya fu arogo marã-ngbeti wẽ: ‘Oni du niruru roni na ki mbu dĩ aboro.’ Ko aya fu asekere wẽ: ‘Ka oni dinga ũmobirimo na kini gumba zire ya.’

 Aboromotumo gbiati aRevi aye fuo Yoane ki sanako nga: ‘Danga mo? Aboro dunduko naaida ka ino da du nga mo.’ Yoane aya: ‘Mi nga fugo napaa ngbakungba yo, nangbembatayo fu aboro koyo du Yekova ni, kina wai Yesaya agumbaha.’

Aboro aima kpinyemu gupai Yoane aayugoho fuyo. Badungu aboro aabaka kina bangiriyo singia Yoane angia Masiya. Ono ko aya fuyo: ‘Gu ko kii kisusi re naye. Mi arẽnga nazaka giri gako rakata te. Mi nabapatizi aboro ni ime, ono ko nika bapatizi aboro ni ziazia toro.’