Zan tun be waajuli kɛ k’a fɔ ko: ‘Mɔgɔ dɔ be nana, min ka bon ni ne ye.’ Yezu tun be ni saan 30 ɲɔgɔn ye tuma min na, a bɔra Galile ka taga Zurudɛn baji la. Zan tun be mɔgɔw batizera o yɔrɔ la. Yezu tun b’a fɛ Zan k’ale batize, nka Zan ko: ‘Ne man ɲi ka ele batize. Ele lo ka ɲi ka ne batize.’ Yezu y’a fɔ Zan ye ko: ‘Jehova b’a fɛ i ka ne batize.’ O kama, u donna Zurudɛn baji kɔnɔ ani Zan ye Yezu fari kuturu bɛɛ tunu jii kɔnɔ.

Yezu bɔnin kɔ jii jukɔrɔ, a ye delili kɛ. O wagati la, sankolo dayɛlɛla ani Ala ka hakili senu kɛra i n’a fɔ tuganin ka jigi Yezu kun na. O tuma na, Jehova kumana kabi sankolo la ko: “I ye ne Dencɛ kanunin ye, i koo ka di ne ye haali.”

Tuma min na Jehova ka hakili senu jigira Yezu kan, a kɛra Krista ye, wala Masiya. Jehova y’a ci dugukolo kan baara min kama, a tun bena o daminɛ sisan.

Yezu batizenin kɔ dɔrɔn, a tagara tile 40 kɛ kongokolon kɔnɔ. A kɔseginin kɔ, a tagara Zan fɛ. Yezu setɔ, Zan ko: ‘Ala ka Sagaden filɛ, min bena mɔgɔw ka jurumu ban.’ O kuma fɛ, Zan y’a yira mɔgɔw la ko Yezu lo ye Masiya ye. Tuma min na Yezu tun be kongokolon kɔnɔ, i b’a lɔn fɛɛn min y’a sɔrɔ wa? An k’o lajɛ.