E a kaman tataekina aei Ioane: ‘E na roko teuare kakannato riki nakoiu.’ Ngke tao ai 30 ana ririki Iesu, e mwananga mai Kariraia nakon te Karaanga ae Ioretan, ike e bwabwabetito iai Ioane. E tangiria Iesu bwa e na bwabetitoia Ioane, ma e taku Ioane: ‘I aki riai ni bwabetitoiko, ma ko riai ngkoe ni bwabetitoai.’ E taku Iesu nakoina: ‘E tangiria Iehova bwa ko na bwabetitoai.’ Ngaia are a ruo n te Karaanga ae Ioretan, ao Ioane e kateboa rabwatan Iesu ni kabane n te ran.

Ngke e otirake man te ran Iesu, ao e tataro. N te tai anne, e kaukaki karawa ao e ruo taamnein te Atua i aona n ai aron te taobe. Ao e taetae Iehova mai karawa ni kangai: “Bon Natiu ngkoe ae ko tangiraki, ae I kakatonga iroum.”

Ngke e ruo taamnein Iehova i aon Iesu, e a riki bwa te Kristo ke te Mesia. E nang moana ngkai te mwakuri are e kanakoa Iehova bwa e na karaoia i aon te aba.

N te tai ae waekoa imwini bwabetitoan Iesu, e a nakon te rereua ao e tiku iai 40 te bong. Ngke e a oki ao e nako ni kawara Ioane. Ngke e a uakaan Iesu ma ngaia, ao e taku Ioane: ‘Ao aei ana Tiibutetei te Atua, ae e na kamaunai aia bure kaain te aonnaba.’ Ngke e taekina aei Ioane, e a tuangia iai aomata bwa Iesu bon te Mesia. Ko ataia bwa tera ae riki nakon Iesu ngke e mena n te rereua? Ti na noria.