Johanes aa zuvarisa kutja, ‘Pe nomundu omunene pu ami ngu me ya.’ Indu Jesus tja ri nozombura ape 30, eye wa za koGalilea okuyenda kOnḓonḓu Jordan, Johanes paa papitisire ovandu. Jesus aa vanga kutja Johanes me mu papitise, posiya Johanes wa tja: ‘Ami hi sokukupapitisa. Oove ngu mo sokundjipapitisa.’ Jesus wa tja ku ye: ‘Muhona ma vanga kutja ove u ndji papitise.’ Okutja owo otji va hita mOnḓonḓu Jordan, nu Johanes wa pundisa Jesus auhe kehi yomeva.

Nu Jesus tja pita momeva, eye wa kumba. Moruveze ndwo, eyuru ra paturuka, nu ombepo yaMukuru ye ya kombanda ye tjimuna onguti. Okuzambo Jehova wa hungira okuza meyuru na tja: “Ove oOve Omuna wandje omusuverwa. Ami mbi nonyuṋe mOve.”

Ombepo yaJehova tji ye ya kombanda yaJesus, eye wa rira Kristus poo Messias. Nambano Jesus aa sokuuta oviungura Jehova mbye mu hindira kombanda yehi.

Tjimanga kombunda yombapitisimo ye, Jesus wa ya mokuti onguza na kakara ngo oure womayuva 40. Indu tja kotoka eye wa ya ku Johanes. Otja Jesus tjee ya ku ye, Johanes wa tja: ‘Indji Ondjona yaMukuru ndji mai isa ko ozondjo zouye.’ Mokutja nao, Johanes aa raere ovandu kutja Jesus ongu ri Messias. Ove hapo mo tjiwa kutja kwa tjitwa tjike ku Jesus indu tja ri mokuti onguza? Indjo tu tare.