John nginjil: ‘Bisi seiku orang ke besai agi ari aku deka datai.’ Lebuh Jesus beumur kira-kira 30 taun, iya datai ari Galili ngagai Sungai Jordan, endur John maptisaka orang. Jesus deka John maptisaka iya, tang John madah: ‘Aku enda patut maptisa nuan. Nuan ke patut maptisa aku.’ Saut Jesus: ‘Jehovah deka nuan maptisa aku.’ Nya alai, seduai iya ngagai Sungai Jordan lalu John nyepuhka Jesus ba dalam ai.

Pengudah Jesus pansut ari ai, iya besampi. Tekala nya, langit tebuka lalu roh kudus Petara nurun inggap ba iya baka burung achang. Udah nya Jehovah bejaku ari serega: ‘Nuan tu Anak ke dikesayauka Aku. Aku rinduka nuan.’

Lebuh roh kudus Jehovah nurun ngagai Jesus, Jesus nyadi Kristus tauka Messiah. Diatu iya ulih berengkah ngereja pengawa ke diasuh Jehovah ba dunya.

Pengudah iya dibaptisa, Jesus ngagai menua puang lalu diau dia pengelama 40 hari. Iya betemu enggau John lebuh iya pulai. Lebuh Jesus mansang semak ngagai iya, John madah: ‘Tu meh Anak Domba Petara, ke muai dosa dunya!’ Enggau nyebut tu, John ngasuh orang nemu Jesus tu Messiah. Nemu nuan nama nyadi ngagai Jesus lebuh iya ba menua puang? Aram kitai meda.