Jọn ọ jẹ ta kẹ ahwo nọ: ‘Ohwo nọ ọ rro vi omẹ ọ be tha.’ Nọ Jesu ọ kpako te ikpe 30 no, o te no obọ Galili ziọ ethẹ Jọdan nọ Jọn ọ jẹ jọ họ ahwo ame. Jesu ọ gwọlọ nọ Jọn ọ họe ame, rekọ Jọn ọ tẹ ta nọ: ‘Mẹ rẹ họ owhẹ ame he. Whẹ họ ọnọ ọ rẹ họ omẹ ame.’ Jesu ọ tẹ ta kẹ Jọn nọ: ‘Jihova ọ gwọlọ nọ whẹ họ omẹ ame.’ Kẹsena aimava a tẹ nya ruọ evaọ ethẹ Jọdan na, Jọn o te duwu Jesu họ-ame na.

Nọ Jesu ọ va no ame ze, ọ tẹ lẹ. Evaọ okioke yena, odhiwu o te rovie, ẹzi Ọghẹnẹ o te bru Jesu ze wọhọ erueruẹ. Jihova ọ tẹ ta ẹme no obọ odhiwu ze inọ: “Whẹ yọ Ọmọ mẹ, oyoyou mẹ na; mẹ jẹ owhẹ rehọ.”

Nọ ẹzi Jihova ọ ruọ Jesu oma no, o te zihe ruọ Kristi, hayo Mesaya na. Fikiere iruo nọ Jihova o vi rie ze ti ru na, obọnana o ti mu ai họ.

Nọ Jesu ọ nwane họ-ame no, o te kpobọ udhude. Ọ rria obei edẹ 40 soso. Nọ o zihe ze, ọ tẹ nyabru Jọn. Nọ Jọn ọ ruẹ Jesu nọ ọ be nyaze, ọ tẹ ta nọ: ‘Ohwo nana họ Omogodẹ Ọghẹnẹ, ọnọ ọ te wha izieraha akpọ na vrẹ.’ Jọn ọ rọ ẹme nọ ọ ta na dhesẹ kẹ ahwo inọ Jesu họ Mesaya na. Kọ whọ riẹ oware nọ o via kẹ Jesu evaọ okenọ ọ jọ obọ udhude na? Ma te ta kpahe onana evaọ uzoẹme nọ o rrọ aro na.