Jɔn bin dɔn de prich se: ‘Pɔsin we strɔng pas mi de kam.’ We Jizɔs bin ol lɛk 30 ia, i kɔmɔt na Galili ɛn go na di Jɔdan Riva usay Jɔn bin de baptayz pipul dɛn. Jizɔs bin want mek Jɔn baptayz am, bɔt Jɔn tɛl am se: ‘Nɔto mi fɔ baptayz yu. Na yu fɔ baptayz mi.’ Jizɔs tɛl Jɔn se: ‘Jiova want mek yu baptayz mi.’ So dɛn go na di Jɔdan Riva, ɛn Jɔn put Jizɔs in wan ol bɔdi insay di wata.

Afta Jizɔs kɔmɔt insay di wata, i pre. As i dɔn fɔ pre so, di ɛvin opin ɛn Gɔd in spirit kam dɔŋ pan am lɛk dɔv. Dɔn Jiova tɔk frɔm ɛvin se: “Yu na mi Pikin, di wan we a rili lɛk; a gladi fɔ yu.”

We Jiova in spirit kam pan Jizɔs, na da tɛm de i bi di Krays ɔ Mɛsaya. Naw i go bigin du di wok we Jiova sɛn am fɔ kam du na di wɔl.

Jɔs afta Jizɔs baptayz, i go de na di wildanɛs fɔ 40 dez. We di 40 dez dɔn, i go fɛn Jɔn. As Jizɔs de go nia Jɔn, Jɔn tɔk se: ‘Dis na Gɔd in Yɔŋ Ship we go pul di sin na di wɔl.’ Jɔn bin se dis fɔ mek di pipul dɛn no se na Jizɔs na di Mɛsaya. Yu no wetin apin to Jizɔs we i bin de na di wildanɛs? Wi go tɔk bɔt dis na di nɛks lɛsin.