Johana nosebedo ka lando kama: ‘Ng’at moro maduong’ moloya biro.’ Ka ne Yesu ochopo jahigni 30 kama, ne odhi e Aora Jordan, kama Johana ne tisoe ji. Yesu ne dwaro mondo Johana otise, kata kamano, Johana ne onyise ni: ‘Ok anyal tisi. In e ma onego itisa.’ Yesu ne odwoke kama: ‘Jehova dwaro mondo in e ma itisa.’ Omiyo, Yesu ne odonjo e i aora, kae to Johana notise konyumo dende duto e i pi.

Ka Yesu ne owuok e pi, ne olemo. Gikanyono, polo ne oyawore, kendo roho mar Nyasaye ne olor kuome e kido mar akuru. Kae to dwond Jehova ne owinjore kowuok e polo ka wacho niya: “In Wuoda ma ahero; aseyie kodi.”

Ka ne roho mar Jehova olor kuom Yesu, kanyo e ma Yesu nobedoe Kristo kata Mesia. Koro ne onyalo chako timo tich ma ne Jehova oore mondo otim e piny kae.

Ka ne osetis Yesu, ne odhi e thim mobedo kuno kuom ndalo 40. Ka ne oduogo, ne odhi neno Johana. Ka Johana ne oneno Yesu, ne owacho kama: ‘Ma e Nyarombo mar Nyasaye ma biro golo richo duto manie piny.’ Weche ma ne owachogo ne omiyo joma ne ni machiegni kanyo obedo gadier ni Yesu e Mesia. Mana kaka wasewacho motelo, Yesu ne odhi e thim bang’ ka ne osetise. Be ing’eyo gik ma ne otimorene ka en kuno? We wane ane.