Juan kiniljuiyaya maseualmej: “Nechka ualas se katli kipia miak chikaualistli, amo kej na”. Kema Jesús kipixtoya se 30 xiuitl, kistejki Galilea uan yajki ipan ueyatl Jordán. Nopaya Juan kinatsonpoliuiltiyaya maseualmej. Maske Jesús kinekiyaya Juan ma kiatsonpoliuilti, ya kiiljuik: “Amo kinamiki na nimitsatsonpoliuiltis. Kinamiki ta tinechatsonpoliuiltis”. Jesús kinankilik: “Jehová kineki ta xinechatsonpoliuilti”. Uajka kalajkej ipan ueyatl Jordán, uan Juan kikalakik Jesús itlakayo atitla.

Kema Jesús kiski atitla, momaijtok. Nimantsi iluikaktli motlapok, uan itonal toTeotsij ualtemok kej se paloma. Uajka Jehová ualkamanaltik uan kiijtok: “Ta tinoKone uan nimitsiknelia miak. Nipaki ika tlen tijchiua”.

Kiampa Jesús kiselik toTeotsij itonal uan kiampa mochijki nopa Mesías o Cristo. Nama ueliskia kipeualtis nopa tekitl tlen Jehová kiiljuijtoya ma kichiua ipan Tlaltipaktli.

Kema Jesús ya moatsonpoliuiltijtoya, yajki ipan uaktok tlali uan nopaya mokajki 40 tonali. Kema tlakuepilik kiitato Juan. Kema Juan kiitak Jesús monechkauiyaya, kiijtok: “Yajaya ipilBorregojtsi toTeotsij tlen techkixtilia totlajtlakoljuaj”. Kiampa kiijtok pampa kinekiyaya maseualmej ma kimatikaj Jesús eliyaya nopa Mesías. ¿Tijmati tlake kipanok Jesús kema itstoya ipan uaktok tlali? Ma tikitakaj.