Juan kitematiltijtoya nejin: “Se akin okachi ueyichiujkej ke nejua ualas amo uejkaua”. Keman Jesús kipiaya kemej 30 xiujmej, kisak Galilea uan ajsito ueyiat Jordán. Ompa Juan kinauijtoya taltikpakneminij. Jesús kinekia maj Juan no kiauiani yejua, sayoj ke Juan kiluij: “Nejua amo monekiskia nimitsauis. Tejua monekiskia tinechauis”. Jesús kinankilij: “Jiova kineki tejua xinechaui”. Yejua ika mokalakijkej itech ueyiat Jordán, uan Juan kipankalakij Jesús itech at.

Satepan ke Jesús kisak itech at, kitataujtij Jiova. Ijkuak, iluikak motapoj, uan iespíritu Dios temok kemej se uiltsin uan motalij itech. Ompa Jiova kiualpanijtoj: “Tejua tinotasojKonetsin. Tikpia notatiochiualis”.

Ijkon Jesús kiselij iespíritu Jiova, uan ijkuak, mochiuak Cristo oso Mesías. Axkan ueliskiaya kichiuas tein Jiova kinauatijka maj kichiua nikan taltikpak.

Niman ke moauij, Jesús yajki taluakyan uan ompa yetoto 40 tonalmej. Keman mokepak, kiitato Juan. Yejua kiitak ke Jesús yaya kiajsiti uan kijtoj: “Yejua nejin iIchkatsin Dios akin kijkuanis tajtakol itech taltikpak”. Kijtoj nejon porin kinekia maj taltikpakneminij kimatinij ke Jesús katka Mesías. ¿Tikmati toni kipanok Jesús keman moajsia taluakyan? Maj tikitakan.