John nahalneʼgo ání: ‘Łaʼ shiláahdi átʼéii nihaa yíghááh.’ Jesus tádiin daatsʼí binááhaigo Gáliliidóó níléí Jórdan toohjįʼ jiníyá, ákweʼé John diné baptize ádeileʼ. Jesus éí John baptize áhodoolííł biniyé baazhníyá, ndi John ání: ‘Nigo yeeʼ tó bee baptize áshidíílííł ńtʼééʼ.’ Jesus éí John áyidííniid: ‘Jiihóvah éí baptize áshidíílííł nóʼní.’ Jórdan tooh nílı̨́įgi jiníʼáázh, áadi John éí Jesus taah jííłtı̨́.

Tó biyiʼdę́ę́ʼ hajííyáago Jesus éí sozdoolzin. Tʼáá ákǫ́ǫ́ yáʼąąsh ąą ádzaa áádóó Diyin God biníłchʼi diyinii hasbídí nahalingo Jesus bikʼijįʼ hadahóóleʼ. Áko Jiihóvah yáʼąąshdę́ę́ʼ haadzííʼ: “ShiYeʼ ayóóʼóóshʼníinii nílı̨́, tʼáá íiyisí naa shił hózhǫ́.”

Jiihóvah biníłchʼi diyinii Jesus bikʼi hooleʼ, kótʼéego Christ doodaiiʼ Mesáíyah jizlı̨́ı̨́ʼ. Jiihóvah nahasdzáán bikáaʼgi naanish haidiníʼánę́ę bizhdeeshnish.

Jesus baptize ábiʼdiilyaadóó bikʼijįʼ honoojíígóó dah diiyá, áadi nijigháago dízdiin yiską́. Jesus nádzaago hachʼįʼ yigáałgo John ázhdííniid: ‘Díí éí Diyin God biDibé Yázhí jílı̨́, nihokááʼ dineʼé bibąąhági átʼéii yóóʼiidiiʼaahii jílı̨́.’ John kódííniidígíí binahjįʼ Jesus Mesáíyah jílı̨́įgi diné bił béédahoozin. Jesus honoojíidi naagháago haash hootʼįįd? Nihił béédahodoozįįł.