Juanqa ñaupajmantaña willasharqa: “Noqamanta aswan atiyniyoj jamonqa”, nispa. Jesusqa 30 watasniyoj jina kashaspa, Galileamanta Jordán mayuman rerqa. Chaypitaj Juanqa runasta bautizasharqa. Jesustaj bautizachikuyta munarqa. Juantaj nerqa: “¿Qanwan bautizachikunay kashajtinchu, noqawan bautizachikoj jamunki?”, nispa. Jesustaj nerqa: “Jehová Diosqa munan qan bautizanawaykita”, nispa. Ajinamanta Juanqa Jesusta Jordán mayupi bautizarqa tukuynin cuerponta yakuman chinkaykuchispa.

Jesusqa yakumanta llojsimuytawan orakorqa. Chay ratopachataj cielo kicharikorqa, Diospa atiynintaj paloma jina pantanman uraykamorqa. Jehová Diostaj nimorqa: “Qanmin munasqa Waway kanki. Qantaqa allinpaj qhawayki”, nispa.

Jesusqa Diosmanta atiyta japʼispa Cristoman chayri Mesiasman tukorqa. Chaymantapachataj Diospa munayninta ruwayta qallarerqa.

Jesusqa bautizakuytawan uj chʼin lugarman rerqa, chaypitaj 40 diasta qhepakorqa. Kutimuspataj Juanman rerqa, Juantaj payta rikuspa nerqa: “Kaymin Diospa Corderonqa, paymin runaspa juchanta chinkachenqa”, nispa. Juanqa chayta nerqa runas reparanankupaj Jesús Mesías kasqanta. Qhepantataj yachakusun Jesús chʼin lugarpi imapichus rikukusqanmanta.