Juanqa, “noqapitapis mas puëdeqmi ichikllachöna yurimunqa” nishpam willakurqan. Y Jesusqa 30 watayoqnö këkarmi Galilëapita Jordan mayuman ëwarqan, y nunakunata bauticëkaqtam Juanta taririrqan, y pëtapis bautizanantam munarqan. Peru Juanqa kënömi nirqan: “Imanötaq noqaqa qamta bautizaqman. Antis qammi noqata bautizamankiman”. Tsënam, “Jehovämi bautizamänëkita munan” nirqan. Tsëmi Jordan mayuman ishkan yëkuyarqan, y tsëchömi yakuman tullpur Jesusta bautizarqan.

Y yakupita yarqaramurqa Jehovämanmi Jesusqa mañakurqan. Y tsë höram ciëlu kichakärirqan, y paluma niraqmi Diospa santu espïritun pëman urämurqan. Y Jehovämi ciëlupita kënö nimurqan: “Qammi kuyë Tsurï kanki. Qampitam alläpa kushikü”.

Tsënömi Jesusqa Jehoväpa santu espïritunta chaskirqan. Y tsëpita patsëmi Cristu o Mesïas këman charqan. Y listunam këkarqan Jehovä mandanqan trabäjuta patsachö ruranampaq.

Bautizakurirllam juk tsunyaq sitiuman ëwarqan y tsëchömi 40 junaq karqan. Kutiramurqa Juanta rikaqmi ëwarqan, y Juanqa shamïkaqta rikëkurmi kënö nirqan: “Taqëmi nunakunapa jutsanta ushakätseq Diospa Achkasnin”. Tsënöqa nirqan Jesus Mesïas kanqanta nunakuna cuentata qokuyänampaqmi. ¿Y musyankiku tsunyaq sitiuchö këkaptin Jesusta ima pasanqanta? Rikärishun.