Bautizaq Juanmi willasharan: “Noqamanta aswan atiyniyoqmi jamushan”, nispa. 30 watanpi jina Jesús kashaqtinmi Galileamanta Jordán mayuman riran, chaypin Juan runakunata bautizasharan. Jesusqa Juanwanmi bautizachikuyta munaran. Paymi ichaqa niran: “Qanmi bautizawanaykiqa manan noqachu”, nispa. Jesustaq niran: “Diosmi munan bautizawanaykita”, nispa. Chaymi Jordán mayuman jaykuspanku Jesusta unuman chinkaykachispa bautizaran.

Unumanta lloqsimuspan Jesusqa Diosmanta mañakuran. Chay ratopin janaq pacha kicharikuran, jinaspa santo espíritu paloma jina Jesusman uraykamuran. Jinan Jehová Dios nimuran: “Qanmi munakusqay Churiy kanki, sonqoypaq jinan kanki”, nispa.

Chhaynatan Jesusqa Diospa espiritunta chaskiran, chaymantapachan Mesías kapuran. Kunanqa atiranñan Jehová Diospa munasqanta kay pachapi ruwayta.

Bautizakusqan qhepallamanmi Jesusqa ch’inneqta riran, 40 p’unchaymi chaypi kamuran. Kutimuspan Juanpa kasqanman riran. Payman Jesús jamushasqanta rikuspan Juanqa niran: “Paymi Diospa corderon, runakunaq juchantan pichanqa”, nispa. Chaytaqa niran runakuna Jesús Mesías kasqanta yachanankupaqmi. ¿Iman Jesusta pasaran ch’inneqpi kashaqtin? Chaymantan qatimuqpi yachasun.