Jean afa lani tënë, atene: ‘Mbeni zo so ayeke kota ahon mbi ayeke ga.’ Na ngoi so Jésus ayeke na ngu 30 tongaso, lo ga na Galilée na Ngu ti Jourdain, ndo so Jean ayeke batize lani azo dä. Jésus aye ti tene Jean abatize lo, me Jean atene: ‘Mbi la mbi doit ti batize mo ape. Mo la mo doit ti batize mbi.’ Jésus atene na Jean, atene: ‘Jéhovah aye ti tene mo batize mbi.’ Tongaso ala gue na yâ ti Ngu ti Jourdain ni, na Jean ayôro Jésus kue na yâ ti ngu ni.

Na peko ti so Jésus asigi na yâ ti ngu ni, lo sambela. Mo ye ti bâ, yayu azi, na yingo ti Nzapa adescend na ndö ti lo tongana mbeni kolokoto. Na pekoni Jéhovah asara tënë na yayu, atene: “So ayeke Molenge ti mbi, lo so mbi ndoye lo mingi, lo so bê ti mbi anzere na lo mingi.”

Na ngoi so yingo ti Jéhovah adescend na ndö ti Jésus, lo ga Christ wala Messie. Lo peut fadeso ti komanse kua so Jéhovah atokua lo ti sara na ndö ti sese.

Hio na peko ti so Jésus awara batême, lo gue na yâ ti benyama na lo sara lango 40 kâ. Na ngoi so lo kiri, lo gue ti bâ Jean. Tongana Jésus angbâ ti ga na mbage ti lo, Jean atene: ‘Ala bâ Kete taba ti Nzapa so ayeke zi ande siokpari ti dunia so.’ Na tenengo tënë ni so, Jean aye ti tene azo ahinga so Jésus la ayeke Messie ni. Mo hinga ye so asi na Jésus lani na ngoi so lo yeke na yâ ti benyama? Zia e bâ ni.