Na talaʻi e Ioane: ʻE iai lē e sili atu nai lo o aʻu o loo mulimuli mai.’ I le pe tusa ma le 30 tausaga o Iesu, na ia sau ai mai i Kalilaia e alu atu i le vaitafe o Ioritana lea sa papatisoina ai e Ioane tagata. Na manaʻo Iesu e papatiso o ia e Ioane, ae na faapea atu Ioane: ʻE lē tatau ona ou papatisoina oe. O oe e tatau ona papatisoina aʻu.’ Na faapea atu Iesu iā Ioane: ʻE finagalo Ieova e te papatisoina aʻu.’ Ona la ō ai lea i le vaitafe o Ioritana, lea na faatofu ai e Ioane Iesu i le vai seʻia oo ina lilofia lona tino atoa i le vai.

Ina ua alu aʻe Iesu mai i le vai, ona ia tatalo lea. O le taimi lenā na matala ai le lagi ma alu ifo ai i ona luga le agaga o le Atua e pei o se lupe. Ona faapea mai lea o Ieova mai i le lagi: “O loʻu Atalii pele oe, ua malie loʻu loto iā te oe.”

Ina ua alu ifo le agaga o Ieova i luga o Iesu, ona avea ai lea o ia ma Keriso po o le Mesia. O lea, o le a amata nei ona ia faia le galuega na auina mai o ia e Ieova e fai i le lalolagi.

O le taimi lava na uma ai le papatisoga o Iesu, ona alu lea o ia i le toafa ma nofo ai mo aso e 40. Ina ua toe foʻi mai o ia, ona ia alu atu lea iā Ioane. A o savali atu Iesu iā te ia, na faapea mai Ioane: “O le Tamaʻi Mamoe a le Atua, o lē e na te aveeseina le agasala a le lalolagi!” O lenei faamatalaga, ua faailoa atu ai e Ioane i tagata o Iesu o le Mesia. Pe e te iloa le mea na tupu iā Iesu a o iai i le toafa? Seʻi o tatou vaai.