Yowano baapwile kulambukisha shi: ‘Kunyima kwande akufiki muntabukile.’ Yesu pabaloombeeshe bipwa bifikye ku 30, bafikile ku Ngalileeya eenda ku Mwela wa Yoordano, kubaadi Yowano abatshisha bantu. Yesu baadi akumiina bwa shi Yowano amubatshishe, anka Yowano bambile shi: ‘Ntshi bya kukubatshisha nya. Obe nyi e kumbatshisha.’ Yesu balungwile Yowano shi: ‘Yehowa akumiina shi obe ombatshishe.’ Abayiile mu Mwela wa Yoordano, Yowano nkuyina Yesu aye eese mu meema.

Kunyima kwa kutuuka mu meema Yesu beelele luteko. Nka mu yaaya nsaa, eyilu dibaadi dibuulukye, aye nkumona kikudi kiselele ky’Efile Mukulu akiyiki bu nkudimba. Akupu Yehowa nkwakula mwiyilu shi: “Obe we Mwan’ade a kifulo kikata, nee noobe mulòo ukata.”

Yesu bafikile Kidishitu sunga Mesiya nsaa ibaadi kikudi kiselele kya Yehowa kimuyikile. Binobino baadi mulombeene kubanga mudimo ubaadi Yehowa mumutume bwa kukita pa nsenga.

Musango umune aye kyapu kubatshishibwa, Yesu baayile mu kabaaka akemukita mafuku 40. Pabaadi mwalukiile, bayile mu kumona Yowano. Pabafikile kwaadi, Yowano baambile shi: ‘Uno nyi mMwana a mukooko a Efile Mukulu akatusha milwisho pa nsenga.’ P’aye kwakula bino, Yowano baadi aukisha bantu shi Yesu baadi Mesiya. Ouku kibaadi kifikile Yesu pabaadi mu kabaaka su? Tubande kutala.