Juan niʼtáraʼa ajngáa rígi̱: “Mbáa bi̱ giʼnii ki xóo ikhúúnʼ ma̱ʼkha̱ nacha̱”. Índo̱ Jesús gíʼdoo xóo 30 tsiguuʼ, nigájnuu náa Galilea mu maʼga̱ asndu náa mañu Jordán. Ikhí Juan nakumíínʼ iyááʼ xa̱bu̱. Jesús nindoo rí Juan makumáʼ iyááʼ ma̱ngaa, mú Juan niʼthúu̱n: “Ikhúúnʼ ragíʼmaa makuʼmánʼ náa iyááʼ. Ikháánʼ gíʼmáán mataxuʼmúnʼ iyááʼ”. Jesús niriʼñuu: “Jeobá nandoo rí ikháánʼ mataxuʼmúnʼ iyááʼ”. Ikha jngó nijngúun náa mañu Jordán, ga̱jma̱a̱ Juan nikumáʼ Jesús mbá xúgíʼ náa iyááʼ.

Nda̱wa̱á rí Jesús nigájna̱a̱ náa iyááʼ niʼthá kháñuu Jeobá. Núkhu má ikhú mekhu nimbaʼtoo ga̱jma̱a̱ espíritu ndrígóo Dios nigajtaa náa ikhaa xóo mbáa paloma. Ikhú Jeobá niʼthí asndu náa mekhu: “Ikháánʼ ni̱ndxa̱ʼ A̱ʼdióoʼ bi̱ nandoʼ ka̱yo̱o̱. Ikháánʼ natani rí naniguuʼ”.

Xúʼko̱ Jesús nigruigú xi̱ʼ kaʼwu ndrígóo Jeobá, ga̱jma̱a̱ asndu nákha ikhú ninindxu̱u̱ Cristo o Mesías. Rí xúgi̱ ma̱ndoo magíʼdu̱u̱ maʼnimbánuu ñajunʼ rí Jeobá nixnángau maʼni náa tsu̱du̱u̱ ku̱ba̱ʼ.

Nda̱wa̱á rí Jesús nijngúun iyááʼ ni̱jkha̱ náa ku̱ba̱ʼ mixooʼ ga̱jma̱a̱ nixtáa ikhí mbá 40 mbiʼi. Índo̱ niguta̱nga̱a̱, ni̱jkha̱ gáʼyoo Juan. Ikhaa ndiʼyoo rí Jesús nakuʼmaminaʼ ga̱jma̱a̱ niʼthí: “Bugi̱ nindxu̱u̱ Aʼdá mugiu̱u̱ Dios bi̱ marígúu aʼkhúun numbaaʼ”. Niʼthí rígi̱ mu mambáñun xa̱bu̱ mbuyáá rí Jesús nindxu̱u̱ Mesías. Lá natayáá rí nigíʼnuu Jesús índo̱ nixtáa náa ku̱ba̱ʼ mixooʼ rá. Guyáá.