Ja Juan wan xcholjel ekʼ ja rason it: «June mas jel ja yip yuja keʼn ojxtani juluk». Yajni ja Jesús ayxa yiʼoj junuk 30 jabʼil, eljan bʼa Galilea sok waj man yok jaʼ Jordán. Ja tiw ja Juan wan yajel yiʼ jaʼ ja ixuk winiki. Ja Jesús skʼana acha ajuk yiʼ jaʼ yuja Juan, pe ja Juan yala: «Mi sbʼejuk keʼn oj kawi jaʼ. Weʼn sbʼej oja waki jaʼ». Ja Jesús sjakʼa: «Ja Jyoba wa skʼana weʼn oja waki jaʼ». Ja yuj ochye bʼa yok jaʼ Jordán, jaxa Juan smulukoʼ ja Jesús ja bʼa yoj jaʼi.

Yajni el ja Jesús ja bʼa jaʼi, yayi orasyon ja Jyoba. Ja bʼa jutsʼin jaw, ja satkʼinal sjama sbʼaj, jaxa yip ja Dyosi koʼ sbʼaj ja yeʼn jastal splanta jun paloma. Anto ja Jyoba kʼumanikon man satkʼinal: «Ja it jani ja Kunini, jel xkʼana juntiro. Yeʼn jtsaʼunej».

Jach ajiyi ja Jesús ja yip ja Jyoba, man bʼa jutsʼin jaw yeʼn kʼot ja Kristo ma Mesías. Sok kʼe stulyi ja aʼtel akʼubʼalyi yuja Jyoba bʼa oj skʼuluk ja bʼa luʼumi.

Yajni chʼak yiʼ jaʼi, ja Jesús waj man bʼa takin kʼinal sok ti ajyi tiw 40 kʼakʼu. Yajni kumxi, waj sleʼ ja Juan. Yajni ja Juan yila wan mojxel och ja Jesús, yala: «Yeʼn ja it ja xchej ja Dyos bʼa oj ya eluk ja mulal ja bʼa luʼumkʼinali». Yala ja it bʼa oj snaʼe kʼinal ja ixuk winik ja Jesús yeʼnani ja Mesías. ¿Wan maʼ xa naʼa jasa ekʼ sbʼaj ja Jesús yajni tey bʼa takin kʼinali? La kiltik.