Tsʼoʼok u máan kʼiin joʼopʼok u kʼaʼaytik Juan lelaʼ: ‹Maʼ tun xáantal ken taalak juntúul máak maas yaan u páajtalil tiʼ teen›. Le yaan kex 30 años tiʼ Jesusoʼ, lukʼ Galileaeʼ ka bin teʼ río Jordanoʼ. Teʼeloʼ Juaneʼ táan kaʼach u tsʼáaik u yokjaʼ le máakoʼoboʼ. Jesuseʼ u kʼáat xan ka tsʼaʼabak u yokjaʼ, chéen baʼaleʼ Juaneʼ tu yaʼalajtiʼ: ‹Maʼ teen unaj in tsʼáaik a wokjaʼiʼ, teech kʼaʼabéet a tsʼáaik in wokjaʼ›. Jesuseʼ tu núukajtiʼ: ‹Jéeobaeʼ u kʼáat ka a tsʼáa in wokjaʼ›. Bey túunoʼ ookoʼob teʼ río Jordanoʼ, Juan túuneʼ tu láaj bulaj u wíinklil Jesús ichil le jaʼoʼ.

Ka jóokʼ Jesús ichil le jaʼoʼ, orarnaj tiʼ Jéeoba. Teʼ súutukoʼ jeʼepaj le kaʼanoʼ ka éem u kiliʼich muukʼ Dios bey juntúul paloma tu yóokʼoleʼ. Ka túun tʼaanaj Jéeoba desde teʼ kaʼanoʼ, ka tu yaʼalaj: ‹Techeʼ in Paalech, máax in yaabiltmaj, teneʼ jach kiʼimak in wóol ta woʼolal›.

Le ka tu kʼamaj Jesús u kiliʼich muukʼ Jéeobaeʼ, kʼuch u beetuba le Mesías wa Cristooʼ. Teʼ súutuk jeʼeloʼ béeychaj u káajsik le meyaj aʼalaʼabtiʼ tumen Jéeoba ka u beet way Luʼumeʼ.

Chéen pʼelak tsʼoʼokik u yokjaʼeʼ, Jesuseʼ bin teʼ desiertooʼ ka pʼáat 40 kʼiinoʼobiʼ. Ka suunajeʼ bin u yil Juan. Ka tu yilaj táan u taal Jesuseʼ, Juaneʼ tu yaʼalaj: ‹¡Letiʼe u Taman Dios, le máax ku luʼsik u kʼeban le yóokʼol kaaboʼ!›. Juaneʼ tu yaʼalaj le tʼaanoʼobaʼ utiaʼal u yáantik le máakoʼob u tsʼáaʼob cuenta Jesuseʼ letiʼe Mesíasoʼ. ¿A wojel wa baʼax úuch tiʼ Jesús le tiaʼan teʼ desiertooʼ? Koʼox ilik teʼ tuláakʼ xookoʼ.