PONJI MI 75
Wonabali ubidho Yesu
I ng’ei ma Yesu ulimo batizo, tipo maleng’ utelo wie nitundo i langa. Ecamu ngo piny moko zoo de pi nindo 40, man kec ubino nege lee mandha. E Wonabali ubin ubidho Yesu man eyero ire kumae: ‘Tekene andha i Wod Mungu, yer ni kidi maeni udok i mukathi.’ Ento Yesu utio ku giragora pi nidwoko ire kumae: ‘Egorere nia tie ngo mukathi kende re ma ketho dhanu kwo. Icikiri niwinjo lembe ceke m’uai i dhu Yehova.’
Bende Wonabali uketho Yesu kendo i ariti kumae: ‘Tekene andha i Wod Mungu, piei piny kud iwi usimburu hekalu. Kum egorere nia Mungu bioro malaika pare pi nimeki.’ Ento Yesu utio kendo ku giragora pi nidwoko ire kumae: ‘Egorere nia icikiri ngo nimulo i Yehova.’
I ng’eye, Sitani unyutho ni Yesu ker ceke m’i ng’om ku lonyo man dwong’ne de, e eyero ire kumae: ‘Abimio iri ker maeni ceke ku dwong’ne de, tekene irum man irwo ira wang’ acel kende ci.’ Ento Yesu udwoko ire kumae: ‘Ai cen, Sitani! Egorere nia icikiri nirwo ni Yehova kende.’
Wonabali ugam uweke, e jumalaika gibino man gitimo ire. Niai eca ci, Yesu ucaku rweyo lembanyong’a mi Ker. Eno re m’ubino tic ma juore pire i ng’om. Dhanu umaru lembe ma Yesu uponjo igi, man gilubo toke kaka moko ci m’ecidho i ie.
“Ka [Wonabali] yero ndra, eyero kum gin m’ebedo ko: kum en e jandra, man e won ndrane.”—Yohana 8:44