Jesusajj bautisaskäna uka qhepatjja, espíritu santow wasarar irpäna. 40 urunakaw jan manqʼat sarnaqäna, ukatwa Jesusajj manqʼat wal awtjayasïna. Ukhamaruw Diablojj Jesusar yantʼañatak purïna. Nayraqatjja akham sänwa: ‘Jumatï cheqapun Diosan wawapästajja, aka qalanak tʼantʼar tukuyam’ sasa. Jesusajj Diosan Aruparjamaw akham säna: ‘Qellqatäskiwa, jaqejj janiw manqʼa sapampikejj jakañapäkiti, jan ukasti Jehová Diosan arunakap istʼasaw jakañapa’ sasa.

Diablojj yaqha yantʼampiw pantjasiyañ munäna, akham sänwa: ‘Jumatï cheqapun Diosan wawapästajja, templo patjjat jalaqtam. Qellqatäskiwa, Diosajj angelanakaparuw jumar salvañatak khitanini’ sasa. Jesusajj mayampiw Diosan Aruparjamajj akham säna: “Qellqatarakiwa: ‘Janiw Jehová Diosamarojj yantʼañamäkiti’” sasa.

Qheparojja Supayajj akapachankir taqe markanakampi kunja qamirïpkitejj taqe ukanakampi uñachtʼayarakïna, akham sasa: ‘Jumatï jichha mä kutik adoritätajja taqe akanakwa churäma’ sasa. Jesusasti sarakïnwa: ‘¡Saram akat Supaya! Qellqatawa: “Jehová Diosarukiw adorañama” sasa’.

Diablojj sarjjänwa. Angelanakaw jutasin Jesusar manqʼa churapjjäna. Uka qhepatjja, Jesusajj Diosan Reinopat suma yatiyäwinak predicañwa qalltäna. Jehová Diosajja, uk lurañapatakiw Jesusarojj aka oraqer khitanïna. Kuntï yatichkäna ukajj wal jaqenakar gustäna, waljaniw taqe cheqar arkapjjarakïna.