Fafisu Yesus ḇyebaptis ramnai, rur ḇesren fyarkin i ḇe sup ḇerursḇa. Yesus inan ḇa ras ri 40, inja ibiser kaku. Ramnai, setan ryama ifrowes Yesus i. Ikofen, ’Romawa Allah risau ido, fadwer karui nane fa nemamami.’ Ḇape Yesus kyarem ḇo doḇo, ’Mnuk oso isya ikofen kokenem ro roḇeyan na monda ḇa. Fandun fa kosouser Yahwe wos Ḇyena kako.’

Ramnai Setan ikofen ḇe Yesus i, ’Romawa Allah risau ido, woper ro bait yaswa mumfes, snaro mnuk oso isya ikofen Allah na iwan malaikat ḇyesya fa siser au.’ Ḇape Yesus kyarem, ’Mnuk oso isya ikofen kofrowes awer Yahwe I.’

Ramnai, Setan fyasnai Karajan ro dunya kuker payamyum ḇyena. Setan ikofen, ’Nari yaḇuk Karajan nane kam ma payamyum ḇyena ḇe Au, mboi wasyom aya rarwan rioser monda.’ Ḇape Yesus kyarem ḇo doḇo, ’Setan, wabur aya! Mnuk oso isya ikofen, Yahwe derer monda kosyom kaku ya.’

Inja Setan ibur i, ma malaikat sya srama fa sḇuk anan ḇe Yesus i. Ramnai, ro fafisu anya ḇeri ḇyaryas ankankinem ḇeḇye Karajan Allah. Fararur ine iso fandun fa Yesus ifrur ro supswan. Snonkaku sya simarisen faro rosai fyarkor ḇe si.  Inja siso i ḇe moḇ risai monda ryaro na.