Vbe Jesu ghi dinmwiamẹ nẹ, orhiọn nọhuanrẹn keghi su ẹre gha rrie uwu ato. Vbe ọ ghi gbe ikpẹdẹ 40 nẹ vbe evba, vbene ọ ma na ya emwi rhọkpa kan unu, ohanmwẹ na gha gbe ẹre. Esu keghi rre do danmwẹ Jesu, vbene ọ na kha wẹẹ: ‘Adeghẹ Ovbi Osanobua ẹre u gele khin, tama avbe okuta na, ne iran khian ebrẹdi.’ Sokpan Jesu keghi ya Evbagbẹn Nọhuanrẹn rhie ewanniẹn nẹ wẹẹ: ‘A gbẹn ọnrẹn yotọ nẹ wẹẹ, ẹi re evbare ọkpa ẹre ọ khian ya ọmwa gha rrọọ. Te u gha danmwehọ ẹmwẹ hia ne Jehova rhirhi ta.’

Vbe iyeke ọni, Esu keghi si Jesu evẹn, ọ na tama rẹn wẹẹ: ‘Adeghẹ Ovbi Osanobua ẹre u gele khin, ke uhunmwu eke nọ yo sẹ vbe ọgua Osa san tuorre. A gbẹn ọnrẹn yotọ nẹ wẹẹ, Osanobua gha gie avbe odibo ọghẹe ne iran da obọ rra ruẹ.’ Sokpan Jesu na vbe ya Evbagbẹn Nọhuanrẹn rhie ewanniẹn nẹ wẹẹ: ‘A gbẹn ọnrẹn yotọ nẹ, ne ọmwa rhọkpa ghẹ mu e Jehova ye edanmwẹ.’

Vbe iyeke ọni, Setan keghi ma Jesu arriọba ọghe uhunmwu otagbọn hia, ke ẹfe kevbe uyi ni lelẹe khian, ọ na tama rẹn wẹẹ: ‘Adeghẹ u na ya uhunmwu rhanmwẹ otọ mẹ uhukpa, I gha mu ena hia nuẹ.’ Sokpan Jesu keghi wanniẹn ọnrẹn wẹẹ: ‘Ladian mwa, Setan! A gbẹn ọnrẹn yotọ nẹ wẹẹ, e Jehova ọkpa ẹre ọ khẹke na ga.’

Esu na ghi kpa, ẹre avbe odibosa na viọ evbare gie Jesu nọ re. Ke ẹghẹ nii kpa, e Jesu na gha kporhu iyẹn nọ maan ọghe Arriọba Osanobua, rhunmwuda wẹẹ, iwinna na ẹre Osanobua wẹẹ nọ do ru vbe agbọn. Te emwa wa hoẹmwẹ emwi ne Jesu ghaa maa iran re, ọni ẹre ọ si ẹre ne iran na gha vẹ lelẹe khian.