Imwini bwabetitoan Iesu, e a kairaki n te taamnei ae raoiroi nakon te rereua. E aki amwarake i nanon 40 te bong, ao e a rangi ni baki. E a roko ngkanne te Riaboro bwa e na kariria Iesu ao e taku nakoina: ‘Ngkana bon Natin te Atua ngkoe, ao tuangia atibu aikai bwa a na riki bwa taian amwarake.’ Ma e kaeka Iesu man te Koroboki ae Tabu, ni kangai: ‘E koreaki bwa e aki tii maiu te aomata n te amwarake. Ko riai ni kakauongo n taeka nako ake e taekin Iehova.’

E a manga kataa Iesu te Riaboro ni kangai: ‘Ngkana bon Natin te Atua ngkoe, ao ewenako mai taubukin te tembora ae te kabanea n rietata. E koreaki bwa e na kanakoia ana anera te Atua bwa a na raweiko.’ Ma e a manga kaeka naba Iesu man te Koroboki ae Tabu, ni kangai: ‘E koreaki bwa ko aki riai ni kataa Iehova.’

Imwina, e a kaotii Tatan nakon Iesu tautaeka n uea ni kabane n te aonnaba ma kaubwaia ao tamaroaia, ao e taku: ‘N na anganiko tautaeka n uea aikai ni kabane ma tamaroaia ngkana ko taromauriai tii teuana te tai.’ Ma e kaeka ni kangai Iesu: ‘An naako Tatan! E koreaki bwa ko riai n taromauria Iehova n tii ngaia.’

Ao e a nako te Riaboro, ao a a roko anera ao a angan Iesu kanana. Ni moa man te tai anne, e a tataekina te rongorongo ae raoiroi Iesu ae taekan te Tautaeka n Uea. Bon anne bukini kanakoana nako aon te aba. A taatangira ana reirei Iesu aomata, ao a ririmwina nakon taabo ake e nako iai.