Woutiisapa Jesuu, oʼuninnüshi nia nutuma chi naaʼinkai Maleiwa chaa isashiipaʼamüin. Meküinsai nia soʼu 40 kaʼi makalaka outuin nia jamü. Nüntaka joo chi Yolujaakai süpüla nuuʼulaküin naaʼin Jesuu. «Müleka shiimainre nüchoin pia Maleiwa, püma sümüin türa ipakalüirua panjaaiwa shia», nümaka nümüin. Nusoutaka Jesuu nümüin: «Müsü tü Ashajuushikat, nnojotsü shiain neʼe choʼujaain sümüin wayuu tü eküütkat süpüla katüin soʼu, choʼujaasia namüin naapajüin nünüiki Jeʼwaa».

Nuuʼulakaka chi Yolujaakai naaʼin Jesuu nüchikuaʼa. «Müleka shiimainre nüchoin pia Maleiwa, pumutta maala iipünaajee saaʼujee tü piichi aʼwaajüleekat. Mataasü sümakai tü Ashajuushikat, nuluwataajeena Maleiwa na aapieekana süpüla nuʼtteʼerüin pia», nümaka nümüin. Nusoutaka Jesuu nüchikuaʼa süka tü Ashajuushikat: «Müsü tü Ashajuushikat nnojolinjachin puuʼulaküin aaʼin Jeʼwaa».

Süpüla nuuʼulaküin Satanaa naaʼin Jesuu apünüintua niiʼiyatüin nümüin süpüshuaʼa suluwataaya wayuu otta tü suwashirüinkat. Müshi nia nümüin: «Taapeerü pümüin süpüshuaʼa suluwataaya wayuu jee tü suwashirüinkat müleka püsapainkale tamülatuʼu uatua neʼe». Nusoutaka Jesuu niʼipajee: «Puʼuna mmata toulia Satanaa. Müsü tü Ashajuushikat niainjachin neʼe Jeʼwaa aʼwaajünaka nümüiwaʼa».

Nuʼunaka joo chi Yolujaakai nümaʼanajee Jesuu, jee antüshii waneirua aapiee nünainmüin Jesuu sünain eʼikajawaa niküin. Süchikijee tia, oʼttushi Jesuu sünain aküjaa süchiki tü Nuluwataayakat Maleiwa. Aapünüsü tia aʼyatawaakat nümüin nutuma Jeʼwaa. Kamalainsü sümüin wayuu tü nikirajakalü anain Jesuu otta oʼunushii naya nümaa eepünaale nia.