Jesús ja ngökabare ñöte ye bitikäre, üai deme nikani ngwena kä ngwarbe nötare yekänti. Köbö 40 te ñaka mröbare kwe yebätä mrö namani krubäte ie. Angwane Diablu nükani Jesús nuinte. Kena niebare kwe ie: ‘Mä abokän Ngöbö Monsoi angwane jä se kwite ban kwrere jai’. Akwa, kukwe nämene Tikani Ngöbö Kukweibätä yebiti Jesús kukwe ne niebare ie: ‘Tä tikani ñan mrö aibebiti ni rabadre nüne. Jehová tä dre niere ye jökrä ni rabadre kukwe nuin arato’.

Diablukwe Jesús nuaninte ta kukwe madabiti: ‘Mä abokän Ngöbö Monsoi angwane, ja täkete timo templo mente kwin yete. Tä tikani krörö Ngöbökwe angeletre juain mä kriemike’. Akwa, kukwe nämene Tikani Ngöbö Kukweibätä yebiti Jesús niebareta bobukäre ie: ‘Tä tikani ni ñaka rabadre Jehová nuinte jire’.

Mrä mada, Satanakwe gobran, jondron ütiäte aune ni käi kitadrekä ye mikani tuare jökrä Jesús ie aune niebare kwe ie: ‘Tikwe gobran aune ni käi kitadrekä ne jökrä biain mäi mäkwe ti mikai täte batibe ye ngwane’. Akwa, Jesús niebare ie: ‘¡Nän mento nete Satana! Tä tikani nikwe Jehová aibe mikadre täte’.

Yebätä Diablu nikani mento aune angeletre ruäre nükani Jesús känti bätä mrö biani kwetre ie. Ye bitikäre, Jesús namani kukwe kwin Gobran Ngöbökwe yebätä driere. Sribi ye Jehovakwe biani nuaindre ie kä tibienbätä. Jesús nämene dirire ye nämene nemen tuin kwin nitre ie aune nitre nämene niken niara jiebiti kä jökrä känti.