Sa tapos mabawtismuhan si Jesus, gintuytuyan sia sang balaan nga espiritu pakadto sa kamingawan. Wala sia nagkaon sa sulod sang 40 ka adlaw, kag gingutom gid sia. Dayon nag-abot ang Yawa para sulayon si Jesus kag nagsiling sa iya: ‘Kon ikaw gid man ang Anak sang Dios, sugua ining mga bato nga mangin mga tinapay.’ Pero nagsabat si Jesus halin sa Kasulatan: ‘Nasulat na nga indi ka lang sa tinapay mabuhi. Dapat mo pamatian ang tagsa ka pulong nga ginahambal ni Jehova.’

Dayon gintestingan liwat sang Yawa si Jesus: ‘Kon ikaw gid man ang Anak sang Dios, maglumpat ka halin sa pinakamataas nga lugar sang templo. Nasulat na nga magasugo ang Dios sing mga anghel para saluon ka.’ Pero nagsabat liwat si Jesus halin sa Kasulatan: ‘Nasulat na nga indi mo dapat pag-ibutang si Jehova sa pagtilaw.’

Dayon, ginpakita ni Satanas kay Jesus ang tanan nga ginharian sa kalibutan kag ang manggad kag ang gahom sini, kag nagsiling: ‘Ihatag ko sa imo ini tanan nga ginharian kag ang ila himaya kon magsimba ka sa akon bisan makaisa lang.’ Pero nagsabat si Jesus: ‘Palayo ka Satanas! Kay nasulat na nga si Jehova lamang ang dapat mo simbahon.’

Dayon naghalin ang Yawa, kag nag-abot ang mga anghel para hatagan si Jesus sing pagkaon. Sugod sadto, ginbantala ni Jesus ang maayong balita sang Ginharian. Amo ini ang hilikuton nga ginapahimo sa iya sa duta. Nanamian gid ang mga tawo sa ginatudlo ni Jesus sa ila, kag ginasunod nila sia bisan diin sia magkadto.