Tom qab Yexus raus dej tag lawd, lub hwj huam dawb huv coj nws mus rau hauv tebchaws moj sab qhua. Yexus yoo mov tau 40 hnub mas nws tshaib plab heev. Dab Ntxwg Nyoog txawm los sim nws tias: ‘Yog koj yog Vajtswv tus Tub tiag, cia li hais kom tej pob zeb no txia ua ncuav.’ Tiamsis Yexus siv Vajtswv Txojlus los teb tias: ‘Twb muaj lus sau cia tias, tsis yog mov xwb thiaj yug tau neeg txojsia. Koj yuav tsum mloog txhua lo lus uas Yehauvas tau hais lawm.’

Tom qab ntawd, dab Ntxwg Nyoog twv Yexus tias: ‘Yog koj yog Vajtswv tus Tub tiag, cia li dhia caws qia saum qhov uas siab tshaj plaws saum lub tuam tsev mus lawm hauv pem teb. Twb muaj lus sau cia tias Vajtswv yuav txib nws cov tubtxib saum ntuj los txais koj.’ Tiamsis Yexus rov siv Vajtswv Txojlus los teb nws tias: ‘Twb muaj lus sau cia tias koj yuav tsum tsis txhob sim Yehauvas.’

Xatas uas yog dab Ntxwg Nyoog txawm muab tag nrho tej tebchaws hauv ntiajteb thiab lawv tej kev vam meej los rau Yexus saib thiab hais tias: ‘Yog koj khwb nkaus pe hawm kuv 1 zaug xwb, kuv yuav muab txhua yam no huvsi rau koj.’ Tiamsis Yexus teb tias: ‘Xatas, cia li khiav mus! Twb muaj lus sau cia tias koj yuav tsum pe hawm Yehauvas tib leeg xwb.’

Dab Ntxwg Nyoog thiaj li mus lawm. Tom qab ntawd, cov tubtxib saum ntuj nqa mov los rau Yexus noj. Txij thaum ntawd los, Yexus mus tshaj tawm txoj xov zoo txog Vajtswv lub Nceeg Vaj. Txoj haujlwm no yog txoj uas Vajtswv txib nws los ua hauv ntiajteb. Tej neeg sawvdaws nyiam mloog Yexus qhia heev, lawv thiaj raws nws qab mus rau txhua txhia qhov chaw.