Ĩtina wa Yesũ kũvatiswa, nĩwatongoewʼe nĩ veva mũtheu nginya weũnĩ. E kũu nĩwekalile mĩthenya 40 ateũya na ĩtina nĩwakwatiwe nĩ nzaa mbingĩ. Ndevili nĩwookie kũmũtata Yesũ ĩvindanĩ yĩu na amwĩa atĩĩ: ‘Ethĩwa kwa wʼo wĩ Mwana wa Ngai, tavya mavia aa matwʼĩke mĩkate.’ Ĩndĩ Yesũ asũngĩie Ndevili kwa kũweta ĩandĩko. Amwĩie atĩĩ: ‘Nĩkũandĩkĩtwe kana andũ mayĩkalawʼa nĩ lĩu wʼoka. Vandũ va ũu, nĩmaĩle kwĩthukĩĩsya kĩla ndeto yumĩte kwa Yeova.’

Ndevili nĩwamũtatie Yesũ ĩngĩ kwa kũmwĩa atĩĩ: ‘Ethĩwa kwa wʼo wĩ Mwana wa Ngai, ĩyĩkye kuma vandũ vala vatũlu vyũ ĩkalũnĩ. Nĩkũandĩkĩtwe kana Ngai akatũma alaĩka make maũkwate.’ Ĩndĩ Yesũ nĩwawetie Maandĩko ĩngĩ na amwĩa: ‘Nĩkũandĩkĩtwe kana ndwaĩle kũmũtata Yeova.’

Na ĩndĩ Satani asyoka amwonyʼa Yesũ mosumbĩ onthe ma nthĩ na monene mamo na amwĩa: ‘Nĩngũũnenga mosumbĩ aa onthe na monene mamo ethĩwa nũũnthaitha o ĩvinda yĩmwe.’ Ĩndĩ Yesũ asũngĩa amwĩa: ‘Thi Satani! Nĩkũandĩkĩtwe kana no Yeova e weka waĩle kũthaitha.’

Ĩtina wa Ndevili kũmũtata Yesũ, nĩwaendie, na alaĩka mooka mamũnenga Yesũ lĩu aye. Kuma vau Yesũ nĩwambĩlĩĩilye wĩa wa kũtavanyʼa ũvoo mũseo wa Ũsumbĩ. Wĩa ũsu nĩwʼo watũmĩtwe oke kũtethya ĩũlũ wa nthĩ. Andũ nĩmendie maũndũ ala Yesũ wamatavasya na kwoou nĩmamũatĩĩaa kĩla vandũ waendaa.