Thutha wa Jesu kũbatithio, nĩ eerekeirio nĩ roho mũtheru werũ-inĩ. Aaikarire thikũ 40 atarĩte kĩndũ na kwoguo akĩhũũta mũno. Thutha ũcio Mũcukani nĩ aathiire kũmũgeria na akĩmwĩra ũũ: ‘Angĩkorũo ũrĩ Mũrũ wa Ngai, ĩra mahiga maya matuĩke mĩgate.’ No Jesu aamũcokeirie na njĩra ya kũgweta ũrĩa Maandĩko moigĩte: ‘Nĩ kwandĩke atĩ to irio tu mũndũ arabatara nĩguo atũũre. Arabatara gũthikĩrĩria kiugo o gĩothe kĩrĩa Jehova oigĩte.’

Mũcukani aacokire akĩgeria Jesu rĩngĩ na akĩmwĩra: ‘Angĩkorũo wĩ Mũrũ wa Ngai, rũga kuuma gacũmbĩrĩ-inĩ ka hekarũ tondũ nĩ kwandĩke atĩ araika nĩ magakwanĩrĩria.’ No o rĩngĩ, Jesu nĩ aagwetire Maandĩko na akĩmwĩra ũũ: ‘Nĩ kwandĩke atĩ ndwagĩrĩirũo kũgeria Jehova Ngai waku.’

Shaitani aacokire akĩonia Jesu mothamaki mothe ma thĩ, ũtonga, na riri wamo na akĩmwĩra ũũ: ‘Nĩ ngũkũhe mothamaki maya mothe o na riri wamo angĩkorũo nĩ ũkũndurĩria maru ũũhoe o rita rĩmwe tu.’ No Jesu akĩmũcokeria ũũ: ‘Njeherera, Shaitani! Nĩ kwandĩke atĩ twagĩrĩirũo kũhoya o Jehova wiki.’

Mũcukani aacokire agĩthiĩ, nao araika magĩũka makĩhe Jesu irio. Kuuma hĩndĩ ĩyo, Jesu aahunjagia ũhoro ũrĩa mwega wa Ũthamaki. Ũcio nĩguo wĩra ũrĩa aatũmĩtwo oke arute gũkũ thĩ. Andũ nĩ maakenagio mũno nĩ maũndũ marĩa mothe Jesu aarutanaga na nĩ maamũrũmagĩrĩra kũrĩa guothe aathiaga.