Konima eshi Jesus a ninginifwa, okwa li a twalwa mombuwa komhepo iyapuki. Okwa ninga omafiku 40 ina lya sha, nokwa li a fya ondjala unene. Opo nee Ondiaboli oya li ye uya okuyeleka Jesus ndele tai ti: ‘Ngeenge ove Omona waKalunga shili, lombwela omamanya oo a shituke omingome.’ Ashike Jesus okwa nyamukula ta kufa mOmishangwa ta ti: ‘Opa shangwa kutya haikulya aike tai dulu okukaleka omunhu nomwenyo. Owa pumbwa okupwilikina kondjovo keshe Jehova ta popi.’

Opo nee Ondiaboli oya yeleka vali Jesus tai ti: ‘Ngeenge ove Omona waKalunga shili, nhuka ko koxulo yotembeli. Opa shangwa kutya Kalunga ota ka tuma ovaengeli vaye ve ku amene.’ Pomhito oyo natango Jesus okwa kufa mOmishangwa ta ti: ‘Opa shangwa kutya ino yeleka Jehova.’

Konima yaasho, Satana okwa ulikila Jesus omauhamba aeshe omounyuni, omaukengeli nefimano lao ndele ta ti: ‘Ohandi ke ku pa omauhamba aeshe aa nefimano lao ngeenge owa twile nge eengolo lumwe ashike.’ Ashike Jesus okwa nyamukula ta ti: ‘Dja po, Satana! Opa shangwa kutya Jehova oye aeke e na okulongelwa.’

Opo nee Ondiaboli oya dja po ndele tai i, novaengeli ova li ve uya ndele tava pe Jesus oikulya. Okudja opo, Jesus okwa kala ta udifa onghundana iwa yOuhamba. Oyo oya li oilonga oyo a li a tumwa e uye a longe kombada yedu. Ovanhu ova li ve hole osho Jesus te va hongo, nova li have mu shikula keshe apa tai.