មេរៀនទី៧៥
មេកំណាចល្បងលលោកយេស៊ូ
ក្រោយពីលោកយេស៊ូទទួលការជ្រមុជទឹក ឫទ្ធានុភាពបរិសុទ្ធបាននាំលោកទៅតំបន់ស្ងាត់ជ្រងំ។ លោកមិនបានបរិភោគអ្វីសោះអស់៤០ថ្ងៃ ដូច្នេះលោកឃ្លានខ្លាំងណាស់។ ពេលនោះមេកំណាចបានមកល្បងលលោកយេស៊ូ ដោយនិយាយថា៖ «បើអ្នកជាកូនរបស់ព្រះមែន ចូរបង្គាប់ឲ្យដុំថ្មទាំងនេះក្លាយជានំប៉័ងទៅ»។ ប៉ុន្តែ លោកយេស៊ូឆ្លើយតប ដោយដកស្រង់ពាក្យពីគម្ពីរថា៖ ‹បទគម្ពីរចែងថា មនុស្សមិនត្រូវរស់ដោយសារតែនំប៉័ងប៉ុណ្ណោះទេ តែដោយសារគ្រប់ទាំងប្រសាសន៍ដែលចេញពីមាត់របស់ព្រះយេហូវ៉ា›។
រួចមក មេកំណាចព្យាយាមល្បងលលោកយេស៊ូថា៖ ‹បើអ្នកជាកូនរបស់ព្រះមែន ចូរលោតចុះពីលើកំពូលវិហារនេះ ពីព្រោះបទគម្ពីរចែងថា ព្រះនឹងចាត់ទេវតាឲ្យទៅទ្រអ្នក›។ ប៉ុន្តែ លោកយេស៊ូបានដកស្រង់ពាក្យពីគម្ពីរម្ដងទៀតថា៖ ‹បទគម្ពីរចែងថា អ្នកមិនត្រូវល្បងលព្រះយេហូវ៉ាឡើយ›។
បន្ទាប់មកទៀត សាថានបានបង្ហាញលោកយេស៊ូនូវរាជាណាចក្រទាំងឡាយក្នុងពិភពលោក និងភាពរុងរឿងរបស់រាជាណាចក្រទាំងនោះ ហើយនិយាយថា៖ ‹ខ្ញុំនឹងឲ្យអ្វីៗទាំងនេះដល់អ្នក បើអ្នកក្រាបប្រណិប័តន៍ខ្ញុំតែមួយដងប៉ុណ្ណោះ›។ ប៉ុន្តែ លោកយេស៊ូតបថា៖ ‹នែសាថាន! ចូរចេញឲ្យឆ្ងាយពីខ្ញុំទៅ! ពីព្រោះបទគម្ពីរចែងថា អ្នកត្រូវគោរពប្រណិប័តន៍តែព្រះយេហូវ៉ាប៉ុណ្ណោះ›។
ពេលឮដូច្នេះ មេកំណាចក៏ចេញទៅ ហើយពួកទេវតាបានយកអាហារមកឲ្យលោកបរិភោគ។ តាំងពីពេលនោះមក លោកយេស៊ូចាប់ផ្ដើមផ្សព្វផ្សាយដំណឹងល្អអំពីរាជាណាចក្រព្រះ។ លោកបានត្រូវចាត់ឲ្យមកផែនដីដើម្បីធ្វើកិច្ចការនេះ។ បណ្ដាជនចូលចិត្តស្ដាប់អ្វីដែលលោកយេស៊ូបង្រៀន ហើយពួកគេបានដើរតាមលោក ទោះជាលោកទៅកន្លែងណាក៏ដោយ។
«ពេលដែលមេកំណាចភូតភរ អ្នកនោះនិយាយតាមចរិតលក្ខណៈរបស់ខ្លួន ពីព្រោះមេកំណាចជាអ្នកភូតភរ ព្រមទាំងជាឪពុកនៃការភូតភរទៀតផង»។—យ៉ូហាន ៨:៤៤